დაავადებათა კონტროლის ცენტრის დირექტორის, ამირან გამყრელიძის განცხადებით, ვაქცინაციის წამახალისებელმა ლატარიამ გარკვეულწილად იმუშავა, თუმცა პროცესისთვის დიდი სტიმული არ მიუცია.

"გარკვეულად იმუშავა, მაგრამ რომ გითხრათ, ძალიან დიდი სტიმული მისცა ლატარიამ, ნამდვილად არა", — განაცხადა მან.

მისივე თქმით, მიმდინარეობს მუშაობა ვაქცინაციის წამახალისებელ ახალ ღონისძიებებზე.

"სოფლის მეურნეობის სამინისტროსთან და სხვა უწყებებთან ერთად მიმდინარეობს მუშაობა ახალ წამახალისებელ ღონისძიებებზე, ანუ თითოეულ აცრილზე, ძირითადად ეს მიმართულია ხანდაზმული მოსახლეობისადმი, სადაც უფრო მეტი გვინდა, რომ იყოს აცრილი.

გარდა ამისა, რა თქმა უნდა, მხედველობაში საჯარო, თუ სხვა სექტორი, სადაც უკვე უნდა იყოს, უკვე არა წამახალისებელი, არამედ სხვა ღონისძიებები, რომელიც რთულია, მარტივი არ არის, მოგეხსენებათ, შემოღება ქვეყანაში ამკრძალავი ღონისძიებების. ბევრი ამას არ ეთანხმება, მაგრამ ეს არის უკვე მესამე ეტაპი. რომ ვნახავთ უკვე ეს მარათონი რას მოგვცემს, პირველი ორი კვირა ვნახოთ როგორი იქნება მარათონის დროს დამყოლობა მოსახლეობის, თუ ვთქვათ, არ გვაძლევს დიდ შედეგს, მერე უკვე მიდიხარ. ეს გაიარა ყველა ქვეყანამ. ეს არ არის ქართული ველოსიპედი", — განაცხადა გამყრელიძემ.

ლატარიის გათამაშებები ვებგვერდზე www.stopcov.lotto.ge ყოველდღე, 12 საათზე იმართება. იმის გასაგებად, მოიგეს თუ არა, აცრილმა მოქალაქეებმა მითითებულ ველში უნდა ჩაწერონ პირადი ნომერი.

ლატარიის საპრიზო ფონდი შეადგენს 2 800 000 ლარს და თამაშდება ყოველდღიურ რეჟიმში წლის ბოლომდე. ყოველდღიური გათამაშების გარდა, არის ყოველკვირეული შემაჯამებელი გათამაშებაც. ყოველდღიურად გათამაშდება 100 და 500 ლარი, ყოველკვირეულად 1 000, 1 500, 5 000 და 10 000 ლარი, ხოლო შემაჯამებელი გათამაშება წლის ბოლოს გაიმართება და საპრიზო ფონდი 100 000 ლარი იქნება.

როგორც საკოორდინაციო საბჭოსთან არსებული ოპერაციული შტაბის ხელმძღვანელმა, გიორგი ღიბრაძემ განაცხადა, ლატარიაში მონაწილეობას იღებენ, როგორც სრულად აცრილები, ისე ერთი დოზით აცრილი მოქალაქეები. კომპანია შემთხვევით შერჩევითობის პრინციპით გამოავლენს გამარჯვებულებს და შესაბამისად შეატყობინებს მათ, ლოტოტრონის პრინციპით კი საბოლოო გათამაშება იქნება.

როგორც ლატარიის კომპანიაში განაცხადეს, რომ ვაქცინირებული მომხმარებლების იდენტიფიცირება პირველი აცრის რეგისტრაციისას NDCD-ის ბაზაში მინიჭებული საიდენტიფიკაციო კოდის მიხედვით ხდება.

მათივე განმარტებით, თუ მოქალაქის ბილეთმა ერთხელ გაიმარჯვა ყოველდღიურ გათამაშებაში, ის აღარ მონაწილეობს მომდევნო ყოველდღიურ გათამაშებაში, მაგრამ მიიღებს მონაწილეობას ყოველკვირეულ და შემაჯამებელ გათამაშებებში, ხოლო თუ ბილეთმა მოიგო ყოველკვირეულ გათამაშებაში, ის ის შემდგომში მონაწილეობას მიიღებს შემაჯამებელ გათამაშებაში.

ლატარიის კომპანიის განცხადებით, 18 წლამდე აცრილი პირის ბილეთი მშობელს, მეურვეს ან ოჯახის სრულწლოვან წევრს გადაეცემა.

მათივე ცნობით,1000 ლარამდე მოგების განაღდება შესაძლებელია საქართველოს ეროვნული ლატარიის სერვის-ცენტრებში, რომლებიც განლაგებულია ყველა მსხვილ სავაჭრო მოლში მთელი საქართველოს მასშტაბით, ხოლო 1000 ლარზე მეტის მოგების შემთხვევაში მოგებულს თანხა ჩაერიცხება მის პირად საბანკო ანგარიშზე.