დაავადებათა კონტროლის ეროვნული ცენტრის დირექტორის მოადგილის, პაატა იმნაძის განცხადებით, კორონავირუსი დაემართება ყველას, ვინც იმუნური არ არის. მისი თქმით, გადაცემის რისკი ზაფხულშიც კი ძალიან მაღალი იყო და ზამთარში კიდევ უფრო გაიზრდება.

"ჩვენ, ყველანაირი გათვლებით, ქვეყანაში მოსახლეობის თითქმის ნახევარი ვირუსის ამთვისებელია. ეს იმას ნიშნავს, რომ ეს დაავადება, ისევე როგორც წითელა და ისევე როგორც, ჩუტყვავილა რომ მოედება ხოლმე ყველას, ვინც არ არის იმუნური, აი, ზუსტად ასე იქნება, ეს ყველას იპოვის, ვინც არ არის იმუნური, ყველას დაემართება. იმის იმედი არავის ჰქონდეს, რომ ვინმე კორონას გადაურჩება", — ამბობს იმნაძე რუსთავი2-თან.

პაატა იმნაძე ასევე ამბობს, რომ ძალიან მძიმე შემოდგომის ბოლო და ზამთრის დასაწყისი გველის. მისი განმარტებით, ჩვენ ვართ არააცრილი პოპულაცია და შესაბამისად, ავადობაც და სიკვდილიანობაც მაღალი იქნება.

19 ოქტომბრის მონაცემებით, საქართველოში სულ 1 920 934 აცრა ჩატარდა, სრულად ვაქცინირებული კი 907 106 ადამიანია.

ამ ეტაპზე ინფიცირების მიმდინარე აქტიური შემთხვევა 40 422 საიდანაც: მძიმე პაციენტია 1 247, მათ შორის, ხელოვნური სუნთქვის აპარატზე იმყოფება 284. 970 ადამიანი მოთავსებულია კლინიკურ-სასტუმროებში, 33 890 პირი ვირუსის მკურნალობის კურსს გადის საცხოვრებელ ბინაზე. საკარანტინე სივრცეებში იმყოფება 61 ადამიანი, თვითიზოლაციაში — 27 836 ადამიანი.

საქართველოში ამ დროისთვის 4 სხვადასხვა ვაქცინაა ხელმისაწვდომი, თუმცა ასტრაზენეკათი აცრა მხოლოდ იმ ადამიანებს შეუძლიათ, ვინც ერთი დოზა უკვე გაიკეთა.

ვაქცინაციის პროგრამაში ჩართვა შეუძლია ყველა მსურველს, 16 წლის ზემოთ. გარდა ამისა, ქრონიკული დაავადებების ან საზღვარგარეთ წასვლის აუცილებლობის შემთხვევაში, აცრას შეძლებენ 12-წლიდან ბავშვებიც.

უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.