საზოგადოებრივი მაუწყებელი თბილისის საქალაქო სასამართლოს მიერ მიღებულ გადაწყვეტილებას, ეკა მიშველაძისთვის 30 ათასის გადახდის დაკისრების შესახებ, გაასაჩივრებს. ამის შესახებ On.ge-ს მაუწყებლის იურისტმა დიმიტრი ბერძენიშვილმა განუცხადა.

მისი თქმით, საჭიროების შემთვევაში, საქართველოში სასამართლოში არსებულ ყველა ინსტანციას გამოიყენებენ.

"ამ ეტაპზე გადაწყვეტილება ჩაბარებული არ მაქვს, ამიტომ, მიჭირს ვიმსჯელო გადაწყვეტილების დასაბუთებაზე. მნიშვნელოვანი გარემოება ისაა, რომ სასამართლომ სხდომაზე განმარტებაა გააკეთა, რომ პოლიტიკური და დისკრიმინაციული გარემოება გამორიცხა და ფაქტიურად ისიც თქვა, რომ გადაცემა დაიხურა სწორად. რაც თქვა, პროცედურების ნაწილი არ იყო დაცულიო, სუფთა შრომის სამართლებრივ ნაწილში შეაფასა," - აღნიშნა ბერძენიშვილმა.

თბილისის საქალაქო სასამართლომ მაუწყებლის ყოფილი თანამშრომლის სარჩელი ნაწილობრივ დააკმაყოფილა. თუმცა, მაუწყებელს მიშველაძის თანამდებობაზე აღდგენა არ დაევალა.

ტოქშოუ პირველი სტუდია საზოგადოებრივ მაუწყებელზე 2015 წოლის 4 სექტემბრიდან დახურა. გადაცემის ავტორს დახურვის მიზეზად საზოგადოებრივი მაუწყებლის დირექტორის მრჩეველმა, ბასა ჯანიკაშვილმა მიშველაძისა და თავისუფალი დემოკარტების ერთ-ერთი ლიდერის, ალექსი პეტრიაშვილის ქორწინება დაუსახელა.