მას შემდეგ, რაც ინფორმაცია გავრცელდა, რომ 6 წლის ბავშვებიც კი იმეორებენ სიუჟეტის ძალადობრივ სცენებს სერიალიდან Squid Game (კალმარის თამაში), სამხრეთ ინგლისის საბჭომ მშობლებს ურჩია, რომ მცირეწლოვან შვილებს ამ სამხრეთკორეული სატელევიზიო შოუს ყურების ნება არ დართონ.

უსაფრთხო განათლებაზე პასუხისმგებელმა გუნდმა მშობლებსა და მეურვეებს წერილები დაუგზავნა, სადაც აღნიშნული იყო, რომ ბავშვები და მოზარდები Netflix-ის ახალი სერიალიდან ძალადობრივ სიუჟეტებს ხშირად იმეორებენ და ამას ყურადღება უნდა მიექცესო.

როგორც The Guardian წერს, მიუხედავად იმისა, რომ სერიალში წარმოდგენილი ბევრი თამაში სპეციალურ იარაღსა და აღჭურვილობას მოითხოვს, ზოგიერთი მათგანი უბრალოდ ცნობილი საბავშვო თამაშების ძალადობრივი ვერსიებია, რომელთა ინვენტარიც ბავშვებისთვის ადვილად ხელმისაწვდომია.

მართალია, ბევრი ბავშვი შოუს არ უყურებს, მაგრამ ისინი სხვადასხვა გამოწვევას TikTok-ის მეშვეობით ეცნობიან, სადაც სოციალური მედიის მომხმარებლები თამაშების საკუთარ ვერსიებს აქვეყნებენ. აღსანიშნავია ის ფაქტიც, რომ სხვადასხვა ინფორმაციით, თამაშის წაგების შემთხვევაში ბავშვები ხშირად დამარცხებულებს ფიზიკურად უსწორდებიან და სცემენ, რაც სერიალიდან გამომდინარე, სიკვდილის შეცვლილი ვერსიაა.

ფოტო: Netflix

ადგილობრივი, ბრიტანელი მოხალისეებით დაკომპლექტებული საბჭოს გაფრთხილება ასევე ეხება თამაშს, სახელწოდებით Honeycomb, რომელიც გულისხმობს თხელი ტკბილეულის ფირფიტის 4 ფორმიდან ნემსის საშუალებით ერთ-ერთის ისე ამოჭრას, რომ ფორმა არ დაირღვას. ბოლო დროს ეს TikTok-ზე ძალიან პოპულარული თამაში გახდა, რამაც იმის საშიშროება გააჩინა, რომ თუ ბავშვები კარამელიზებული შაქრიდან ფორმების ამოჭრას თავად შეეცდებიან, ეს დამწვრობით შეიძლება დამთავრდეს.

"ჩვენ მკაცრად გირჩევთ, რომ ბავშვებმა Squid Game-ს არ უყურონ, რადგან შოუ ძალადობრივი შინაარსითაა სავსე", — ნათქვამია საბჭოს წერილში.