ამერიკის შეერთებული შტატების თავდაცვის მდივნის, ლოიდ ოსტინის განცხადებით, აშშ-ს მხარდაჭერა საქართველოს ტერიტორიული მთლიანობის მიმართ მტკიცე და უცვლელია. ამის შესახებ მან საქართველოს თავდაცვის მინისტრთან, ჯუანშერ ბურჭულაძესთან ერთად გამართულ პრესკონფერენციაზე ისაუბრა.

"მსურდა ვყოფილიყავი აქ პირადად, რადგან ამერიკის შეერთებული შტატები დიდად აფასებს საქართველოს, როგორც მტკიცე, სტრატეგიულ პარტნიორს. ჩვენი მხარდაჭერა საქართველოს სუვერენიტეტისა და ტერიტორიული მთლიანობის მიმართ უცვლელი და მტკიცეა", — განაცხადა მან.

დღეს საქართველოს თავდაცვის სამინისტროსა და აშშ-ის თავდაცვის დეპარტამენტს შორის მემორანდუმი გაფორმდა, რომელიც საქართველოს თავდაცვისუნარიანობისა და შეკავების შესაძლებლობების გაძლიერებას ისახავს მიზნად. მემორანდუმს ხელი ჯუანშერ ბურჭულაძემ და ლოიდ ოსტინმა მოაწერეს.

ოსტინი საქართველოში დღეს ჩამოფრინდა. მას აეროპორტში საქართველოს თავდაცვის მინისტრი, ჯუანშერ ბურჭულაძე დახვდა. აშშ-ის საელჩოს განცხადებით, ლოიდ ოსტინი საქართველოში ჯუანშერ ბუჭულაძის გარდა, პრემიერმინისტრ ირაკლი ღარიბაშვილსაც შეხვდება.