ბრიტანელმა მომღერალმა ადელმა, რომელიც ექვსწლიანი პაუზის შემდეგ სიმღერით Easy On Me დაგვიბრუნდა, დღიური ნახვის კატეგორიაში Spotify-ის რეკორდი მოხსნა. ადელის ახალ სიმღერას 24 საათის განმავლობაში 24-მა მილიონმა ადამიანმა მოუსმინა, რითაც სამხრეთკორეული ჯგუფის BTS-ის სიმღერა Butter უკან ჩამოიტოვა.

Easy on me პირველი სიმღერაა ადელის ახალი ალბომიდან, სახელწოდებით 30, რომლის გამოშვებასაც მომღერალი 19 ნოემბერს აანონსებს. შეგახსენებთ, რომ ადელის წინა ალბომი 25 2015 წელს გამოვიდა და მომღერალი მუსიკალურ კარიერას მხოლოდ ექვსი წლის შემდეგ დაუბრუნდა. Instagram-ის პოსტში მომღერალი წერს, რომ "ცხოვრების ყველაზე მღელვარე პერიოდში ეს ალბომი ამოუდგა მხარში და საკუთარი თავის შესახებ მწარე სიმართლეც გააცნობიერა".

დიდი ალბათობით, 30 ადელისა და მისი მეუღლის სიმონ კონეცკის განქორწინებას უკავშირდება. წყვილს შორის განქორწინების პროცესი მარტში დასრულდა, იმის მიუხედავად, რომ ისინი ორი წელია დაშორებულები არიან. მომღერალმა Vogue-ს განუცხადა, რომ ალბომი მისი მხრიდან ცხრა წლის შვილისთვის განქორწინების ახსნის მცდელობაა, რასაც გაზრდის შემდეგ გაიგებს.

"ის ბევრ მარტივ კითხვას მისვამს, რაზეც პასუხი არ მაქვს", — ამბობს მომღერალი შვილის შესახებ. "ის ხშირად მეკითხება, თუ რატომ აღარ მიყვარს მისი მამა, თუმცა 9 წლის ბავშვისთვის იმის ახსნას აზრი არ აქვს, რომ მამა ისევ მიყვარს, მაგრამ მასზე შეყვარებული აღარ ვარ", — დასძინა ადელმა.

ადელის ახალ სიმღერას ქვემოთ მოცემულ ვიდეოში შეგიძლიათ მოუსმინოთ: