ჟენევაში 12-13 ოქტომბერს გამართული მოლაპარაკებების 54-ე რაუნდზე, რუსეთმა თბილისს მის მიერ ოკუპირებულ აფხაზეთთან და ცხინვალთან ე.წ. საზღვრის დელიმიტაცია-დემარკაციისკენ მოუწოდა. კრემლი ამას რეგიონში უსაფრთხოების გაძლიერების მიზნით ხსნის.

რუსეთის საგარეო საქმეთა სამინისტრო განცხადებაში ასევე, აღნიშნავს, რომ საქართველოს მიერ გაეროს გენერალურ ასამბლეაზე ყოველწლიურად განსახილველად გამოტანილი რეზოლუცია იძულებით გადაადგილებულ პირთა საკუთარ სახლებში დაბრუნებაზე "კონტრპროდუქტიული, კონფრონტაციული, ცალმხრივი, რეალობას მოწყვეტილი და ტენდენციურია".

საქართველოს საგარეო საქმეთა სამინისტროს თანახმად, ჟენევაში, დევნილთა თავიანთ სახლებში საუბრის დაწყებისთანავე მონაწილეებმა მოსკოვიდან, სოხუმიდან და ცხინვალიდან მოლაპარაკებები დატოვეს. მათივე ინფორმაციით, მოლაპარაკებებზე განხილულ საკითხებს შორის იყო უკანონოდ დაკავებული საქართველოს მოქალაქეების გათავისუფლება, ოკუპირებული ტერიტორიების დე ფაქტო ანექსია და ჰუმანიტარული პრობლემები.

მოლაპარაკებების მორიგი რაუნდი მიმდინარე წლის 7-8 დეკემბერს გაიმართება.

ჟენევის საერთაშორისო მოლაპარაკებები შექმნილია 2008 წლის 12 აგვისტოს ცეცხლის შეწყვეტის შესახებ შეთანხმების საფუძველზე. მოლაპარაკებები იმართება ევროკავშირის, გაეროსა და ეუთოს თანათავმჯდომარეობით და საქართველოს, რუსეთის ფედერაციისა და ამერიკის შეერთებული შტატების მონაწილეობით. სამუშაო ჯგუფის შეხვედრებს ესწრებიან აგრეთვე ყოფილი სამხრეთ ოსეთის ავტონომიური ოლქის დროებითი ადმინისტრაციის ხელმძღვანელი და აფხაზეთის ავტონომიური რესპუბლიკის მთავრობის თავმჯდომარე ისევე, როგორც ცხინვალისა და სოხუმის საოკუპაციო რეჟიმების წარმომადგენლები.