შინაგან საქმეთა სამინისტრომ დააკავა კაცი, რომელიც, მათი განცხადებით, აშშ-სა და კანადაში არალეგალურად გამგზავრებისა დ აიქ უკანონოდ დარჩენის მსურველებს ყალბ დოკუმენტებს უმზადებდა.

"სამართალდამცველებმა, საქმეზე მიმდინარე გამოძიების ფარგლებში, მოსამართლის განჩინების საფუძველზე, დ. ს.-ის დანაშაულებრივი ქმედების ფარული ვიდეო-აუდიო გადაღება და სატელეფონო მიყურადება განახორციელეს.

გამოძიებით დადგინდა, რომ ბრალდებული საქართველოს ერთ-ერთ მოქალაქეს 16 000 აშშ დოლარის სანაცვლოდ აშშ-ში არალეგალურად გამგზავრებაში დახმარებას დაჰპირდა და წინასწარ გამოართვა 4000 ლარი", — ვკითხულობთ უწყების მიერ გავრცელებულ განცხადებაში.

ბრალდებულის სახლის ჩხრეკისას შსს-მ ნივთმტკიცებად ამოიღო საქართველოს მოქალაქის 76 პასპორტი, 3 საბანკო პლასტიკური ბარათი, 2 მეხსიერების ბარათი, კომპიუტერული ტექნიკა, 2 მობილური ტელეფონი, სავარაუდოდ, ნარკოტიკული საშაულება მარიხუანა, დოკუმენტების დასამზადებელი დანადგარი და დოკუმენტები.

გამოძიება საქართველოს სისხლის სამართლის კოდექსის 344 პრიმა-2 მუხლის მე-2 ნაწილის გ ქვეპუნქტებით მიმდინარეობს, რაც საქართველოს მოქალაქის უცხო ქვეყანაში წინასწარი შეცნობით უკანონოდ დარჩენისთვის შესაბამისი პირობების შექმნას გულისხმობს. დანაშაული 3-დან 6 წლამდე ვადით თავისუფლების აღჯვეთას ითვალისწინებს.