ავღანეთში, მეჩეთში აფეთქების შედეგად სულ მცირე 72 ადამიანი გარდაიცვალა და 140-ზე მეტი დაშავდა. Aljazeera-ს ინფორმაციით, 8 ოქტომბერს, ავღანეთის შიიტურ უმცირესობაზე მომხდარ თავდასხმაზე პასუხისმგებლობა ხორასანის ისლამურმა სახელმწიფომ (ISIS-K) აიღო. გამოცემა ადგილობრივზე დაყრდნობით წერს, რომ მსხვერპლთა უმრავლესობა ახალგაზრდები იყვნენ.

სამირ აზიზი პარასკევის ლოცვის დაწყების მოლოდინში, თავის სახლში იყო, როდესაც აფეთქების ხმა გაიგო.

"ათობით ადამიანი იყო. მოხუცი კაცები, ახალგაზრდა ბიჭები, ყველა სისხლის გუბეში იწვა. ხალხი დახმარებას ითხოვდა", — განუცხადა 25 წლის კაცმა Aljazeera-ს.

აზიზიმ თქვა, რომ ინციდენტიდან მალევე მოსახლეობა დაჭრილების სამედიცინო დაწესებულებებში გადაყვანას ცდილობდა. მისი თქმით, სასწრაფო დახმარების მანქანები ადგილზე არ მისულან, სულ მცირე, 40 წუთის განმავლობაში.

"ჩვენ ძალიან ცოტანი ვიყავით, მაგრამ ჩვენ გავაკეთეთ ის, რაც შეგვეძლო, ვცდილობდით ადამიანების საავადმყოფოში გადაყვანას", — თქვა მან.

ნაჯილა ჰუსეინის ძმა, აჯმალი, ახალგაზრდა მლოცველებს შორის იყო. როდესაც აფეთქების ხმა გაიგეს, გაიქცნენ მეჩეთისკენ, რომელიც 200 მეტრში მდებარეობდა.

"ყველა სისხლით იყო მოსვრილი. მე განვაგრძე აჯმალის ძებნა", — თქვა მან და დასძინა, რომ არ ახსოვს, რამდენი დრო დახარჯა მისმა ოჯახმა აჯმალის ძებნაში, სანამ მიხვდებოდა, რომ ის ან მისი სხეული იქ არ იყო.

ოჯახი თითქმის 2 დღე ეძებდა მიმდებარე საავადმყოფოებსა და კლინიკებში აჯმალს, მაგრამ ჯერჯერობით ვერ იპოვა.

თალიბანმა დაგმო თავდასხმა და პირობა დადო, რომ დამნაშავეების წინააღმდეგ ზომებს მიიღებს. ეს უკვე მესამე თავდასხმაა, რომელიც ISIS-K-მ განახორციელა.