მიხეილ სააკაშვილის მამის, ნიკოლოზ სააკაშვილის განცხადებით, შვილის საქართველოში ჩამოსვლის შესახებ არაფერი იცოდა არც მან და არც ექსპრეზიდენტის გარემოცვამ. მისივე თქმით, ამის შესახებ მაშინ გაიგეს, როდესაც მიხეილ სააკაშვილის ვიდეოები გავრცელდა.

"მე და მისმა გარემოცვამ, მისმა ახლობლებმა, მისმა ოჯახმა, ჩვენმა ოჯახმა, ჩვენ, შინაურებმა ყველამ ეს გავიგეთ, იყო სენსაცია, გადარეკა-გადმორეკა ერთმანეთთან, როდესაც გამოჩნდა პირველი ვიდეო. როდესაც ის თავისი ჩვეული ღიმილით, თავზე "კაპიშონით", წვიმის პირობებში, ძველებური ჩვენი მიშა გამოჩნდა ბათუმის პორტის თუ რაღაცის ფონზე", — განაცხადა მიხეილ საკაშვილმა TV პირველის ეთერში.

27 სექტემბერს ექსპრეზიდენტმა სააკაშვილმა ფეისბუქზე გამოაქვეყნა ბილეთების ფოტო, რომლის მიხედვითაც ქვეყანაში 2 ოქტომბერს, ხმის მიცემის პროცედურის დასრულების შემდეგ უნდა დაბრუნებულიყო. მმართველ გუნდში ამბობდნენ, რომ ის სიტყვას ისევ უღალატებდა და ჩამოსვლას ვერ გაბედავდა, მაგრამ თუ მაინც გაბედავდა, აეროპორტშივე დააკავებდნენ. თუმცა, არჩევნების წინა დღეს, პირველ ოქტომბერს, სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას.

სანამ სააკაშვილი მხარდამჭერებს მობილიზაციისკენ მოუწოდებდა, ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. იმავეს ამბობდა შინაგან საქმეთა სამინისტროც და ამტკიცებდა, რომ მას არც უკრაინის და არც საქართველოს საზღვრები არ გადაუკვეთავს. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს. მოგვიანებით, იმედის ეთერში პრემიერმინისტრი ამტკიცებდა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება.

ამავე თემაზე: