შინაგან საქმეთა მინისტრის, ვახატან გომელაურის თქმით, მშენებლები ვარაუდობენ, რომ 26 მაისის ქუჩაზე 5-სართულიანი კორპუსის ჩამონგრევის ადგილას საფრთხე ისევ არის, ვინაიდან, შესაძლოა, კიდევ მოხდეს რაღაცის ჩამოშლა. გომელაური ამბობს, რომ მშენებლები შეიკრიბებიან და შესაბამის გადაწყვეტილებას მიიღებენ.

"მშენებლები ვარაუდობენ, რომ ადგილზე საფრთხე ისევ არის, ვინაიდან, შესაძლოა, კიდევ მოხდეს რაღაცის ჩამოშლა. ვხედავთ, რომ ე.წ. სინკარებია, ბეტონებია გადმოწეული და სანამ არ მოხდება მშენებლების შეკრება, ისმჯელებენ როგორ უნდა მოხდეს ბეტონების, სინკარების ჩამოხსნა და დაექვემდებარება დემონტაჟს, თუ არის რაღაც ნაწილი მაინც, რომელიც იყო მობმული ამ კორპუსზე. ამას უკვე მშენებლები გადაწყვიტავენ", — განაცხადა გომელაურმა.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. ბოლო ინფორმაციით, დაღუპულია 9 ადამიანი. ერთ-ერთი 9 ოქტომბერს საავადმყოფოში გარდაიცვალა. დაღუპულებს შორის 3 არასრულწლოვანია, ერთი 7 წლის, მეორე წლისა და 3 თვის და მესამე 12 წლის.

ბათუმში სამაშველო ღონისძიება თითქმის 30 საათის განმავლობაში მიმდინარეობდა.

ბათუმში მომხდარი ტრაგედიის გამო, 11 ოქტომბერი გლოვის დღედ გამოცხადდა. მთავრობის განკარგულებით, ორშაბათს 00:00 საათიდან, 12 ოქტომბრის 00:00 საათამდე, საქართველოს მთელს ტერიტორიაზე სახელმწიფო დროშები დაეშვება.