ლონდონში გუშინ მომხდარი ტერორისტული თავდასხმის შედეგად 4 ადამიანი დაიღუპა. მათ შორის არიან 40 წლის ქალი, 50 წლის კაცი, პოლიციელი და თავად თავდამსხმელი.

BBC-ის ინფორმაციით, პოლიციამ ცოტა ხნის წინ შეასწორა ინფორმაცია 5 დაღუპულის შესახებ. რეიდების შედეგად და ტერაქტთან კავშირში დაკავებულია 7 ადამიანი.

დაშავებულია 40 ადამიანი. მათგან 7 კრიტიკულ მდგომარეობაშია. დაშავებულებს შორის არის პოლიციის ორი ოფიცერი.

სკოტლენდ-იარდის ინფორმაციით, ტერაქტი ლონდონის დროით შუადღის 2:40 საათზე დაიწყო. თავდამსხმელი ვესტმინსტერის ხიდზე მოსიარულე ადამიანებში მანქანით შევარდა და გზა განაგრძო. თავდასხმამ ადგილზე მოკლა 2 ადამიანი.

პარლამენტის წევრი ტობიას ილვუდი პირველი იყო, რომელმაც დაშავებულ პოლიციელს პირველადი დახმარება აღმოუჩინა.

ფოტო: Stefan Rousseau / PA

თავდასხმის დროს, ერთი ქალი ხიდიდან წყალში გადახტა. ის გადაარჩინეს, თუმცა სერიოზული დაზიანებები აქვს.

ტერორისტმა მანქანა პარლამენტის შენობასთან შეაჯახა და შემდეგ დანით შეიარაღებულმა სცადა შენობაში შეჭრა.

ამ დროს, მან სასიკვდილოდ დაჭრა შეუიარაღებელი პოლიციელი, რა მომენტშიც მას სხვა შეიარაღებულმა პოლიციელმა ესროლა და მოკლა.

დაღუპული პოლიციელი 48 წლის კეის პალმერი იყო, რომელიც პოლიციის ოფიცრად 15 წლის განმავლობაში მსახურობდა.

პოლიციის განცხადებით, თავდამსხმელი მარტო მოქმედებდა და მათთვის მისი ვინაობა ცნობილია. გამოძიების ინფორმაციით, ის საერთაშორისო ტერორიზმით იყო შთაგონებული.

პრემიერმინისტრმა ტერეზა მეიმ თავდასხმა ავადმყოფობად და გარყვნილებად შეაფასა და დასძინა, რომ ეს შემთხვევა დიდი ბრიტანეთის ღირებულებებს ვერ დაარღვევს:

"თავდასხმისთვის ეს ადგილი შემთხვევით არ იყო შერჩეული. ტერორისტმა ჩვენი დედაქალაქის გული საგანგებოდა შეარჩია, სადაც ყველა რელიგიის, ეროვნების, კულტურის ადამიანები იკრიბებიან, ისინი ზეიმობენ თავისუფლებას, მის ღირებულებებს, დემოკრატიას და სიტყვის თავისუფლებას. ნებისმიერი მცდელობა, ჩვენი ღირებულებებისთვის ძირის გამოთხრისა, წარუმატებლად დასრულდება".

დაშავებულებს შორის არიან ადგილობრივი მოქალაქეები, ტურისტები, სტუდენტები სხვადასხვა ქვეყნებიდან.

2005 წლის შემდეგ, ეს იყო ყველაზე მასშტაბური ტერორისტული თავდასხმა ლონდონზე. 12 წლის წინ ივლისში ოთხმა ბრიტანელმა თვითმკვლელმა ტერორისტმა ბომბები ააფეთქეს და საჯარო ტრანსპორტის 52 მგზავრი მოკლეს.

ტერორისტული თავდასხმა ბრიუსელის თავდასხმიდან 1 წლის თავზე მოხდა.

ლონდონის ტერაქტში დაღუპულებისა და დაშავებულების საპატივსაცემოდ, გუშინ ეიფელის კოშკის განათებები ჩაქვრა.