შინაგან საქმეთა მინისტრ ვახტანგ გომელაურის ინფორმაციით, ბათუმში, ნანგრევებში ერთი ადამიანის ცხედარი იპოვეს. ამის შესახებ მან ჟურნალისტებს ბათუმში განუცხადა.

"ორი ადამიანი ცოცხალი იქნა ამოყვანილი, მძიმე მდგომარეობაში, თუმცა ცოცხალი. კონტაქტურები იყვნენ ორივე. გადაყვანილები არიან საავადმყოფოში. სავარაუდოდ, ერთი ადამიანის ცხედარია კიდე ნანახი, დამიზუსტებენ ახლა", — აცხადებს ის.

მისი თქმით, გარდაცვალებას 100%-ით ვერ ადასტურებს და ახლა მუშაობენ, რომ ნახონ.

"სავარაუდოდ, ადამიანის ცხედარია, ახლა მუშაობენ, რომ აწიონ ეს სინკარები და ნახონ, სავარაუდოდ, გარდაცვლილი უნდა იყოს", — აცხადებს შს მინისტრი.

რაც შეეხება ნანგრევებში მოყოლილ ადამიანთა რაოდენობას, გომელაური ამბობს, რომ დაახლოებით 10-დან 15-მდე ადამიანს ვარაუდობდნენ და ახლაც იგივეს ფიქრობენ, თუმცა ამ დრომდე აზუსტებენ და 10-ზე მეტი არ უნდა იყოს. მისი განმარტებით, ზუსტ რაოდენობას ვერ ამბობენ, რადგან შეიძლება ვინმე სტუმრად იყო ან არ არის გამორიცხული, რომ ბინებში, რომელთა მეპატრონეები ქალაქში არ არიან, ვინმე ყოფილიყო.

"ჩვენი ვარაუდით, დაახლოებით 7-8 კაცი, ნუ, 10 კაცზე მეტი არ უნდა იყოს შიგნით. თუმცა ვმუშაობთ მთელი ღამე და თუნდაც ხვალამდე გაგრძელდება, სანამ ბოლომდე არ მივიყვანთ სამუშაოებს. ძალიან დიდი მასაა და ფრთხილად მუშაობენ, რომ ჩვენი მუშაობით პირიქით, თუ გადარჩენილია ადამიანი, არაფერი დავუზიანოთ. [...] ვერ ვადასტურებთ იქედან გამომდინარე რაოდენობას, რომ შეიძლება სტუმრად იყო ვინმე, ბევრი დაკეტილი ბინა იყო და მფლობელები თბილისში არიან, ისინი ვერ გვიდასტურებენ, ბინაში ვინმე იყო თუ არა, არის შემთხვევები, როდესაც აცხადებენ, რომ ნათესავს ჰქონდა გასაღები, ეს ნათესავი იძახის, არავინ შემიშვია, თუმცა ამას ვერ ვადასტურებთ, აქედან გამომდინარე, რაოდენობას ვერ გეუბნებით ზუსტს", — აცხადებს ის.

მისივე თქმით, მეზობლების ინფორმაციით, ნანგრევებში დაახლოებით 2 ან 3 ბავშვია.

ვახტანგ გომელაური აცხადებს, რომ სამუშაო მძიმეა, რადგან ჩამონგრეული კორპუსი ორ კორპუსს შორისაა და მისადგომად ორივე მხრიდან მუშაობენ.

"ყველაფერს ვაკეთებთ, რომ რაც შეიძლება სწრაფად მოხდეს ამ ყველაფრის გადმოლაგება, რომ თუ ცოცხალი ადამიანი გადარჩა, სწრაფად ვუშველოთ და გადავიყვანთ საავადმყოფოში".

დღეს, 8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. მაშველები 11 საათზე მეტია ცდილობენ ნანგრევების ქვეშ მოყოლილი ადამიანების ამოყვანას. ამ დროისთვის გამოყვანილია ორი ადამიანი, ორივე მათგანი ცოცხალია. ცნობილია, რომ ქალის მდგომარეობა უკიდურესად მძიმეა, კაცის ჯანმრთელობის შესახებ ინფორმაციის დაზუსტებას On.ge ამ წუთებშიც ცდილობს. გარდა ამისა, დღის განმავლობაში ნანგრევების ქვეშ მოყოლილი მანქანიდან ამოიყვანეს წლის და 3 თვის ბავშვი. ის საავადმყოფოდან უკვე გაწერეს.

მსხვერპლის შესახებ ინფორმაცია, ჯერჯერობით, არ ვრცელდება. ამ დრომდე უცნობია ნგრევის მიზეზიც. გამოძიება სისხლის სამართლის კოდექსის 240-ე მუხლით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.

გაიგე მეტი: