შინაგან საქმეთა სამინისტრო არ გამორიცხავს, რომ ნიკა კვარაცხელიას მკვლელობის საქმეში ბრალდებულთა წრე გაფართოვდეს. ამის შესახებ უწყების მიერ გავრცელებულ განცხადებაშია საუბარი. შსს-ს ცნობით, საქმეზე შესაბამისი საპროცესო და საგამოძიებო მოქმედებები გრძელდება.

მათი განცხადებით, ჩვენებებისა და საქმის დეტალების ანალიზის საფუძველზე, დანაშაულის ჩამდენი პირების ვინაობისა და დანაშაულის მოტივის დასადგენად დაისახა რამდენიმე საგამოძიებო ვერსია, რომელთა გადასამოწმებლად ინტენსიურ რეჟიმში განხორციელდა ყველა საჭირო ოპერატიულ-სამძებრო და საგამოძიებო ღონისძიება, თუმცა უწყებაში არ აკონკრეტებენ, დანაშაულის ჩადენის მოტივის ვერსიებს.

"ბრალდებულები სამართალდამცველებისთვის კვალის არევის მიზნით, პერიოდულად იცვლიდნენ ტანსაცმელს, ავტომანქანებს და თავშესაფარ ადგილებს, რაც ართულებდა მათი ადგილმდებარეობის დროულად დადგენას და დაკავებას. 2021 წლის 7 ოქტომბერს, სამართალდამცველებმა, ჩატარებული კომპლექსური საგამოძიებო-ოპერატიული და სამძებრო ღონისძიებების შედეგად, ორივე ძებნილი პირი წყნეთში დააკავეს.

პოლიციის მიერ დადგენილ იქნა ის საცხოვრებელი სახლი, სადაც ბრალდებულები ბოლო რამდენიმე დღის განმავლობაში თავს აფარებდნენ. ორივე ბრალდებულმა დაკავებისას მიმალვა სცადა, თუმცა აქტიური დევნის შედეგად მოხდა მათი დაკავება. ბრალდებულთა პირადი ჩხრეკისას ამოღებულ იქნა დანები, ხოლო მათ ხელბარგში ნანახი იქნა მათი კუთვნილი საქართველოს მოქალაქის პასპორტები, ტანსაცმელი და სხვა პირადი ნივთები", — ნათქვამია განცხადებაში.

ნიკა კვარაცხელიას მკვლელობაში ბრალდებულები პოლიციამ თბილისში, წყნეთში დააკავა 7 ოქტომბერს დააკავა. კვარაცხელია 15 სექტემბერს ანჯაფარიძის ქუჩაზე დაჭრეს, რის შემდეგაც კლინიკაში გარდაიცვალა. ის Forbes-ის 30 წლამდელთა სიაში იყო. კვარაცხელია, ასევე, საქართველოში ონლაინ-პლატფორმა Feedc შემქმნელია.

შსს-ს ცნობით, საქმეში ბრალდებულები 21 წლის ა.ჭ. და 22 წლის გ.კ. არიან, რომლებიც უწყების განცხადებით, კვარაცხელიას მკვლელობის განზრახვით, წინასწარ შემუშავებული გეგმით მოქმედებდნენ. მათივე ინფორმაციით, გამოძიება საქართველოს სისხლის სამართლის კოდექსის 109-ე მუხლით და 236-ე მუხლის მე-3 და მე-4 ნაწილებით მიმდინარეობს, რაც ჯგუფურად ჩადენილ განზრახ მკვლელობასა და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს. კვარაცხელიას მკვლელობაში ბრალდებულ 2 პირს აღკვეთის ღონისძიების სახით პატიმრობა დაუსწრებლად 20 სექტემბერს შეუფარდეს.