შინაგან საქმეთა სამინისტროს განცხადებით, გურიაში საფლავების გაქურდვისთვის წარსულში ნასამართლევი ორი პირი — 1980 წელს დაბადებული რ.პ. და 1991 წელს დაბადებული კ.კ. დააკავეს.

შსს-ს ინფორმაციით, ბრალდებულებმა სხვადასხვა დროს, ლანჩხუთის მუნიციპალიტეტში 5 საფლავი გაქურდეს, მათ შორისაა, სოფელ ქვიანში მდებარე, შინდისის გმირის — რუსლან წულაძის საფლავი, საიდანაც ალუმინის ნაკეთობა მოიპარეს.

"ბრალდებულებმა საფლავებიდან მოპარული ლითონის დეტალები ქალაქ ზესტაფონში მდებარე შავი და ფერადი ლითონების მიმღებ პუნქტში ჩააბარეს. პოლიციამ ნაქურდალი ნაკეთობები ნივთმტკიცების სახით ამოიღო", — წერია განცხადებაში.

უწყების ცნობით, მომხდარზე გამოძიება სისხლის სამართლის კოდექსის 258-ე მუხლის მე-3 ნაწილის "ა" ქვეპუნქტით მიმდინარეობს, რაც მიცვალებულისადმი უპატივცემულობას და საფლავზე არსებული ნივთის ჯგუფურად მართლსაწინააღმდეგო დაუფლებას გულისხმობს.