საშინელებათა ჟანრის მოყვარულებისთვის მშვენიერი სიახლე გვაქვს: ჰილჰაუსის მოჩვენების შემქმნელი მაიკ ფლენეგანი ახალი სერიალით დაგვიბრუნდება — საშინელებათა ჟანრის ცნობილი რეჟისორი ედგარ ალან პოს მოთხრობების მიხედვით ნეტფლიქსთან ერთად ახალ პროექტზე, სახელად The Fall Of The House Of Usher მუშაობს.

ახალი სერიალი 8 ეპიზოდისგან შედგება. მართალია, ნეტფლიქსს ახალ პროექტთან დაკავშირებული დეტალები ჯერ არ გაუხმაურებია, თუმცა თავად სერიალი ედგარ ალან პოს 1839 წელს გამოცემული მოთხრობის სახელს ატარებს. გავრცელებული ინფორმაციით, სერიალი პოს რამდენიმე ნამუშევრის მიხედვით იქმნება.

რეჟისორმა ნეტფლიქსისთვის საშინელებათა ჟანრის ოთხი სერიალი უკვე შექმნა: The Haunting of Hill House, The Haunting of Bly Manor, Midnight Mass და The Midnight Club, რომელსაც მალე ვიხილავთ. ედგარ პოს ნაწარმოებების მიხედვით გადაღებულ სერიალზე მაიკ ფლენეგანთან ერთად კვლავ ტრევორ მეისი და მაიკლ ფაიმოგნარი იმუშავებენ. მიუხედავად ამისა, ახალი პროექტი ამ სერიალებისგან დამოუკიდებელ ისტორიას მოგვიყვება.

ჯერჯერობით The Fall of the House of Usher-ის გამოსვლის თარიღი ცნობილი არაა, მაგრამ თუ სხვა ნამუშევრებით ვიმსჯელებთ, წინ საოცარი სანახაობა გველის!