პარტია ტრიბუნას ლიდერის, დავით ჭიჭინაძის განცხადებით, იმის მიუხედავად, რომ ირაკლი ღარიბაშვილი გარკვეული დროის განმავლობაში იყო თავდაცვის და შინაგან საქმეთა მინისტრი, მან არ იცის სხვაობა მხუთავ აირსა და ცრემლსადენ გაზს შორის. ჭიჭინაძე ასე ღარიბაშვილის მიერ დღეს გავრცელებულ ფეისბუქპოსტს გამოეხმაურა, სადაც ის თავდაპირველად წერდა, რომ მიხეილ სააკაშვილის დააანონსებულ აქციაზე მხუთავ აირს გამოიყენებდნენ, კრიტიკის შემდეგ კი, მხუთავი აირი ცრემლსადენი გაზით შეცვალა.

"ის განცხადება, რომ მხუთავი აირით დაწამლავს ადამიანებს, ნუ, ადამიანი იყო ამდენი ხანი თავდაცვის მინისტრი, შინაგან საქმეთა მინისტრი და არ იცის, რომ ამას ჰქვია ცრემლსადენი გაზი, ჰქვია წიწაკიანი გაზი და არა მხუთავი. მხუთავი აირების გამოყენება საერთაშორისო კონვენციებით აკრძალულია, იმიტომ რომ მკვლელია მხუთავი გაზი და პირველი მსოფლიო ომის მერე პრაქტიკულად არავის აღარ გამოუყენებია. სირიაში იქნა გამოყენებული და ამასაც მთელი მსოფლიო გამოეხმაურა და თუ რუსთაველზე აპირებს ირაკლი ღარიბაშვილი მხუთავი აირის გამოყენებას, ვფიქრობ ჰააგის ტრიბუნალს ნამდვილად ვერ აცდება", — განაცხადა ჭიჭინაძემ ფორმულასთან საუბრისას.

6 ოქტომბერს პრემიერმინისტრმა ექსპრეზიდენტზე ვრცელი ფეისბუქპოსტი გამოაქვეყნა, რომელშიც ავითარებს სხვადასხვა აზრს, განიხილავს ჭორს და თეორიას იმაზე, თუ რატომ ჩამოვიდა ის ქვეყანაში. ვერსიებს შორის პრემიერს ნარკოტიკებზე დამოკიდებულება და სახელმწიფო გადატრიალებაც აქვს ისე, რომ ბრალდებების გასამყარებლად არა ფაქტები, არამედ მოსაზრებები მოჰყავს. ის დამამცირებელ კონტექსტში საუბრობს იმაზე, თითქოს "სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა". უცნობია, რას ეყრდნობა ღარიბაშვილი, თუმცა ფსიქიკურ ჯანმრთელობაზე ირონიულად საუბარი აძლიერებს სტიგმას და დისკრიმინაციულია. პრემიერმინისტრის მსგავსად, ამ საკითხზე დამცინავ კომენტარებს აკეთებენ ქართული ოცნების სხვა ლიდერებიც.

ღარიბაშვილის ამ წერილს კრიტიკული გამოხმაურებები მოჰყვა ოპოზიციის მხრიდან. დროას ლიდერმა, ელენე ხოშტარიამ პრემიერმინისტრის ამ განცხადებას ფსკერი უწოდა და დაამატა, რომ ამ გზით ღარიბაშვილი ძალის დემონსტრირებას ცდილობს. ფოთის მერობის კანდიდატმა, გიგი უგულავამ პრემიერის წერილს კოტე ყუბანეიშვილის ლექსით უპასუხა და აღნიშნა, რომ მას შიში ალაპარაკებს. ერთიანი ნაციონალური მოძრაობის წევრმა და ქუთაისის მერობის კანდიდატმა, ხატია დეკანოიძემ განაცხადა, რომ "ასეთი სიმდაბლის პუტინის გამორჩეულ პროპაგანდისტებსაც შეშურდებოდათ". ლელოს ერთ-ერთი ლიდერი კახა კოჟორიძე ღარიბაშვილის მხრიდან პატიმრის ფსიქიკურ მდგომარეობაზე ცინიკურ საუბარს ამორალურ საქციელს უწოდებს. მიხეილ სააკაშვილის ადვოკატმა, ბექა ბასილაიამ კი აღნიშნა, რომ ექსპრეზიდენტი მხნედაა და ქართული საზოგადოება "ღარიბაშვილის ენაჭარტალა მონაჭორს" არ უნდა აჰყვეს. მან პრემიერს "ჩელენჯი" შესთავაზა — განუცხადა, რომ მზადაა, სააკაშვილმა ნარკოტესტი ჩააბაროს და თავადაც იმავენაირად უნდა მოიქცეს.

გაიგეთ მეტი:

• მდარე ჭორიკნის მარჩიელობაა, ქართულ პოლიტიკაში ყველაზე სამარცხვინო ღარიბაშვილია — ბერძენიშვილი
• ხელისფლება არ ერიდება არც სიძულვილის ენას, არც არანაირი ბოროტების დაბრალებას — სამნიძე ღარიბაშვილზე
• ღარიბაშვილმა კიდევ ერთი პარანოიული ნარკვევი შემოგვთავაზა ბატონი ბიძინას ეპისტოლურ ჟანრში — გეგელია