კალიფორნიის შტატში მცხოვრები კაცი ექსტრასენსს უჩივის და ამბობს, რომ მას მოტყუებით დაპირდნენ იმ ჯადოს მოხსნას, რომელიც ყოფილმა შეყვარებულმა ჯადოქარს მის ქორწინებაზე დაადებინა.

მაურო რესტრეპო აცხადებს, რომ ნათელმხილველი, სახელად სოფია ადამსი, მას ჯადოს მოხსნით ქორწინების გადარჩენაში დახმარებას დაპირდა, თუ 5 100 დოლარს გადაუხდიდა.

მაურო რესტრეპომ სასამართლოში უკვე შეიტანა სარჩელი, სადაც ამტკიცებს, რომ ექსტრასენსი სოფია ადამსი მას ეუბნებოდა, რომ თუ ჯადოს არ მოიხსნიდა, მისი "ოჯახი საფრთხეში ჩავარდებოდა".

სასამართლოში წარდგენილ დოკუმენტებში ვკითხულობთ: ექსტრასენსთან სტუმრობისას მაურო რესტრეპოს ტაროს კარტით უმკითხავეს და უთხრეს, რომ "ყოფილმა შეყვარებულმა დაქირავებული ჯადოქრის მეშვეობით მას ჯადო დაადო" და თუ ამ წყევლას როგორმე არ მოიხსნიდა, მაშინ საფრთხე დაემუქრებოდა მის ქორწინებას და შვილებს.

BBC-ის ცნობით, რესტრეპო ახლა როგორც ფინანსური, ისე მორალური ზიანის ასანაზღაურებლად $25 000-ს ითხოვს.

დაზარებული ჰყვება იმისაც, თუ როგორ დაუკავშირდა ნათელმხილველს: სოფია ადამსის შესახებ Google-ში ინფორმაციის მოძიებისას გაიგო, სადაც მის საიტს გადააწყდა და ისეთმა აღწერებმა, როგორებიცაა "სასიყვარულო ურთიერთობების სპეციალისტი" და "ცხოვრების მართვის დოქტორი", მის პროფესიონალიზმში დაარწმუნა.

თუმცა, როგორც ჩანს, მალავე გაუცრუვდა იმედები.