ქართული კინოსა და თეატრის დამსახურებული მსახიობი ამირან ქადეიშვილი 85 წლის ასაკში გარდაიცვალა.

თავისი მრავალწლიანი სამსახიობო კარიერის განმავლობაში მას სხვადასხვა დროს მონაწილეობა აქვს მიღებული ისეთ ფილმებში, როგორებიცაა მთვარის მოტაცება, ციმბირელი პაპა, მევლუდი და პირველი მერცხალი, თუმცა მას ქართველი მაყურებელი ყველაზე კარგად რეჟისორ გიორგი შენგელაიას 1980 წლის მუსიკალური კომედიიდან სიყვარული ყველას უნდა ხირხალას როლით იცნობს.

კადრი ფილმიდან სიყვარული ყველას უნდა.

ფოტო: ეროვნული ფოტომატიანე

საქართველოს კულტურის, სპორტისა და ახალგაზრდობის სამინისტროს ცნობით, ამირან ქადეიშვილი 1953-1985 წლებში იყო ოზურგეთის ალექსანდრე წუწუნავას სახელობის პროფესიული სახელმწიფო დრამატული თეატრისა და თეატრ "ძველი სახლის" მსახიობი.

ამირან ქადეიშვილს 2018 წელს ქართულ ხელოვნებაში შეტანილი წვლილისთვის გადაეცა კულტურის სამინისტროს ჯილდო "ხელოვნების ქურუმი".