ყოფილი პირველი ლედი, სანდრა რულოვსი აცხადებს, რომ ექსპრეზიდენტ მიხეილ სააკაშვილისა და ლიზა იასკოს ვიდეოს შინაარსი მისთვის მოულოდნელი, ფორმა კი სრულიად მიუღებელი იყო. ფესიბუქპოსტში ის წერს, რომ სააკაშვილი პოლიტმატიმარია და პირადი ემოციების მიუხედავად, ინარჩუნებს რწმენას, რომ "ამ ბრძოლიდან გამარჯვებულები გამოვლენ".

"მიხეილ სააკაშვილი პოლიტიკური პატიმარია და როგორც საქართველოს მოქალაქე, სრულიად ვუერთდები მისი გათავისუფლების მოთხოვნას.

ბევრი დაბნეული მეგობარი და თანამებრძოლი მეკითხება პირადი ცხოვრების თაობაზე. არ დაგიმალავთ, რომ პარასკევს საღამოს დადებული ვიდეოს შინაარსი ჩემთვის მოულოდნელი იყო, ფორმა კი სრულიად მიუღებელი.

პირადი ემოციების მიუხედავად, ვინარჩუნებ სიმშვიდეს და რწმენას, რომ ამ ბრძოლიდან გამარჯვებულები გამოვალთ", — წერს რულოვსი.

მას შემდეგ, რაც ექსპრეზიდენტი დააკავეს, მის ფეისბუქგვერდზე გადაზიარდა უკრაინის რადის დეპუტატის, ლიზა იასკოს გავრცელებული ვიდეო, რომელშიც სააკაშვილი აცხადებს, რომ ერთად არიან. ვიდეოში სააკაშვილი ამბობს იმასაც, რომ ახალ ოჯახს და ახალ ცხოვრებას იწყებს და აღნიშნავს, რომ წინა ურთიერთობების მადლიერია. ლიზა იასკო გუშინ, 5 სექტემბერს საქართველოში ჩამოვიდა და ექსპრეზიდენტის სანახავად ციხეში იყო შესული.