ცენტრალური საარჩევნო კომისია (ცესკო) საარჩევნო უბნებზე ელექტროენერგიის გათიშვის შესახებ გავრცელებულ ინფორმაციას მცდარს უწოდებს.

"ელექტროენერგია კვლავ ხდება არჩევნების დღეს სხვადასხვა დაინტერესებული მხარეების მხრიდან მანიპულაციის თემა და შესაბამისად კვლავ ვრცელდება ინფორმაცია, რომ ხდება მასობრივად ელექტროენერგიის გათიშვა საარჩევნო უბნებზე; რაც შესაძლოა საარჩევნო პროცესის მიზანმიმართულად დაზიანების მცდელობას წარმოადგენს", — ვკითხულობთ განცხადებაში, — "გავრცელდა ინფორმაცია, რომ ქუთაისში დიდ საარჩევნო უბნებზე (იგულისხმება ამომრჩეველთა რაოდენობის თვალსაზრისით) ელექტროენერგია გათიშეს; აღნიშნული კი სიმართლეს არ შეესაბამება. ქუთაისში 2 საარჩევნო უბანს მხოლოდ რამდენიმე წუთი შეუწყდა ენერგომომარაგება".

იმავე განცხადების თანახმად, ელექტროენერგია ტექნიკური პრობლემის გამო 2 საარჩევნო უბანს გაეთიშა რუსთავში, სადაც უკვე მიტანილია გენერატორები და უბნები ჩვეულ რეჟიმში აგრძელებენ მუშაობას.

საარჩევნო უბნებში ელექტროენერგიის გათიშვაზე ინფორმაცია დღეს ქუთაისის მერობის კანდიდატმა, ხატია დეკანოიძემ გაავრცელა. "ქუთაისში, ყველაზე ოპოზიციურ უბნებზე შუქს მასიურად აქრობენ! ავტოქარხანაშიც გათიშეს!", — წერდა დეკანოიძე ფეისბუქგვერდზე. ამავეს აცხადებდა ნაციონალური მოძრაობის ერთ-ერთი ლიდერი, ლევან ხაბეიშვილი.

ინფორმაციის გავრცელების მერე On.ge დაუკავშირდა ენერგო პრო ჯორჯიას, სადაც აცხადებენ, რომ ქუთაისში, გამსახურდიას ქუჩაზე ავარიული გამორთვა იყო 20 წუთის განმავლობაში, თუმცა ელექტროენერგიის მიწოდება მას მერე აღდგა.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.