სახალხო დამცველი ნინო ლომჯარია რუსთავის ციხეში ექსპრეზიდენტ მიხეილ სააკაშვილის სანახავად მივიდა. მისი თქმით, აინტერესებს მისი უფლებრივი მდგომარეობა და მასთან პოლიტიკური შეკითხვები არ აქვს.

"ალბათ, თქვენც გაინტერესებთ ხომ მისი მდგომარეობა, ბევრი კითხვები გაქვთ. მე ჩემი მანდატიდან გამომდინარე, შემიძლია ვნახო დაკავებული პირი და გამოვიტან ამ ინფორმაციას. როგორც წესი, დაკავებულები თავად საუბრობენ ჩვენთან, რა მდგომარებაში არიან, სჭირდებათ თუ არა რაიმე დახმარება, მათ შორის, პირველადი, სამედიცინო, დაკავების დროს მოპყრობა როგორი იყო და ა.შ.", — განაცხადა მან.

მანვე აღნიშნა, რომ შაბათ-კვირას საპატიმროში დაწესებულებაში ადვოკატებს არ უშვებენ, მაგრამ იმედი აქვს, რომ საკითხის რეზონანსულობიდან გამომდინარე, სააკაშვილის უფლებადამცველებს ამის საშუალებას მისცემენ.

მიხეილ სააკაშვილი პირველ ოქტომბერს დააკავეს და პენიტენციურ დაწესებულებაში გადაიყვანეს. ინფორმაცია მისი დაკავების შესახებ პრემიერმინისტრმა გაავრცელა. ბრიფინგზე მას თან ახლდნენ შინაგან საქმეთა მინისტრი და სახელმწიფო უსაფრთხოების სამსახურის უფროსი, თუმცა მათ არც განცხადება გაუკეთებიათ და არც კითხვებზე უპასუხიათ.

აღსანიშნია, რომ ამ ბრიფინგამდე, მთელი დღის განმავლობაში ქართული ოცნების ლიდერები ამტკიცებდნენ, რომ სააკაშვილი იტყუება და ის არათუ საქართველოში, არამედ უკრაინაშია, შსს კი აცხადებდა, რომ მას არც საქართველოს და არც უკრაინის საზღვარი არ გადმოუკვეთავს. მეტიც, ირაკლი კობახიძე ამბობდა, რომ სააკაშვილი საქართველოში არ არის, მისი ვიდეოები ფეიკია და იმაზე უფრო მარტივი ტექნოლოგიითაა გაკეთებული, ვიდრე DeepFake. მის პასუხად სააკაშვილის თანაგუნდელები ამბობდნენ, რომ ის ნამდვილად ჩამოვიდა.