საქართველოს განათლებისა და მეცნიერების სამინისტრო უარყოფს ინფორმაციას იმის შესახებ, რომ მასწავლებლებისთვის სავალდებულო ვაქცინაციაზე კანონპროექტი მზადდება. ისინი აცხადებენ, რომ აცრა ნებაყოფლობითია და თავად Unicef-თან ერთად ვაქცინაციაზე ცნობიერების ამაღლების კამპანიას აწარმოებენ. მათივე თქმით, მასწავლებლებს აცრისკენ მუდმივად მოუწოდებენ.

სამინისტროს ინფორმაციით, ამ ეტაპზე საქართველოს მასშტაბით, აცრილია საჯარო და კერძო სკოლების მასწავლებელთა და სკოლების ადმინისტრაციის თანამშრომელთა 65% და პროცესი გრძელდება.

ინფორმაცია მასწავლებლების ვაქცინაციის შესახებ დღეს ინფექციური საავადმყოფოს დირექტორმა თენგიზ ცერცვაძემ გაავრცელა. მან განაცხადა, რომ დღეს დარეგისტრირდა კანონპროექტი, რომელიც მასწავლებლებს ვაქცინაციას დაავალდებულებდა. ცერცვაძე განმარტავდა, რომ ამ ნაბიჯის გადადგმა საჭიროა.

"ყველა ქვეყანამ გააკეთა ეხლა ეს და ჩვენთან იძახე შენ, რომ არ შეიძლება, ვთქვათ, რაიმე იძულებითი იყოს. ყველა ქვეყანამ გააკეთა. რაღაცა მსოფლიოში ყოველთვის არის იძულებითი. კი, გამოხატვის თავისუფლება, პიროვნების თავისუფლება ძალიან, ასე ვთქვათ, უზენაესია, მაგრამ რაღაცა იძულებითი არის", — ამბობდა ცერცვაძე.