პრემიერმინისტრის, ირაკლი ღარიბაშვილის განცხადებით, ფორმულას დამფუძნებლისა და თავდაცვის ყოფილი მინისტრის, დავით კეზერაშვილის წინააღმდეგ თავდაცვის სამინისტროს მიერ შეტანილი სარჩელი შეეხება "სწორედ იმ გაფლანგულ ათეულობით და ასეულობით მილიონ დოლარს, რომელიც მისი მინისტრობის დროს მოხდა სამინისტროში".

"ერთ-ერთი ფაქტი დადასტურდა, როდესაც სასამართლომ დამნაშავედ ცნო ბატონი კეზერაშვილი დაუსაბუთებელი, ზოგადად ამ გაუგებარი პროგრამების დაფინანსებისთვის. კერძოდ, თუ არ ვცდები 5 მილიონი იქნა გადარიცხული ერთ-ერთ ოფშორულ კომპანიაზე და არავითარი არც სერვისი არ იქნა გაწეული და არც არავითარი შეიარაღება არ ჩამოსულა. ასეთი ფაქტი არის უამრავი და რა თქმა უნდა, გამოძიება ყველა ამ ფაქტს გასცემს შესაბამის პასუხს", — აცხადებს ის.

დღეს, 30 სექტემბერს საქართველოს თავდაცვის სამინისტრომ ყოფილი თავდაცვის მინისტრის, დავით კეზერაშვილისა და მისი თავდაცვის მინისტრობის დროს სახელმწიფო შესყიდვების დეპარტამენტის უფროსის, ალექსანდრე ნინუას წინააღმდეგ საქალაქო სასამართლოში სარჩელი შეიტანა. სამინისტროს განცხადებით, ისინი თავდაცვის უწყების მიმართ "დანაშაულებრივი ქმედებით მიყენებული ზიანის" ანაზღაურებას ითხოვენ.