პრემიერმინისტრის, ირაკლი ღარიბაშვილის განცხადებით, მათი "მთავარი სურვილი და ამოცანა" იყო, რომ რაც შეიძლება მეტი დამკვირვებელი ყოფილიყო საქართველოში ადგილობრივი თვითმმართველობის არჩევნებისთვის. ამის შესახებ მან ჟურნალისტებთან ისაუბრა.

"აპრილის თვეში საგარეო საქმეთა მინისტრმა გაუგზავნა ოფიციალური მოწვევა, წერილი ეუთოსა და ოდირს, იმისთვის, რომ რაც შეიძლება მეტი დამკვირვებელი გამოეგზავნა საქართველოში ამ არჩევნებისთვის. ამას გარდა, ჩართულნი არიან NDI, IRI-ს ორგანიზაციის დამკვირვებლები, ევროპარლამენტარები და ჩვენი მთავარი სურვილი და ამოცანა იყო, რაც შეიძლება მეტი დამკვირვებლის მობილიზება საქართველოში. იმისთვის, რომ ერთი მხრივ, მთავრობა იღებს ვალდებულებას და პასუხიმგებლობას, რომ მაქსიმალურად გამჭვირვალე, თავისუფალი, კონკურენტული არჩევნები ჩაატაროს და არცერთი კითხვა არ დარჩეს პასუხგაუცემელი", — განაცხადა მან.

დღეს, 30 სექტემბერს საქართველოში ევროპარლამენტარები ჩამოფრინდნენ. ისინი 2 ოქტომბერს თვითმმართველობის არჩევნებს დააკვირდებიან. არჩევნებს ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.