"ერთად ყოფნაში რომ ფულს გვიხდიან, მაგას რა სჯობს"

1 წლის წინ კარდაშიანების ოჯახმა განაცხადა, რომ ცნობილი ამერიკული რეალითი შოუ Keeping Up With the Kardashians 14 წლის შემდეგ მე-20 სეზონით სრულდებოდა. ამ განცხადებიდან 3 თვის შემდეგ Hulu-მ გაავრცელა ინფორმაცია, რომ 2021 წელს კარდაშიანების ოჯახთან ახალი პროექტის შესაქმნელად რამდენიმე მილიონიან შეთანხმებას მიაღწია.

გავრცელებული ინფორმაციით, ახალი პროექტიც წინას მსგავსად რეალითი შოუ იქნება. დაახლოებით 2 კვირის წინ ელენის შოუში კიმ კარდაშიანმა დაადასტურა, რომ ახალი პროექტი ოჯახის ცხოვრებაში მიმდინარე მოვლენებს სწრაფადვე გამოეხმაურებოდა. კიმის თქმით, გადაღებები შემოდგომას დაიწყებოდა და იმედი ჰქონდათ, რომ პრემიერაც იმავე სეზონზე მოესწრებოდა. ცოტა ხნის წინ კი ინსტაგრამ story-ში მიკროფონის ფოტოც დადო წარწერით "პირველი დღე".

ახალი რეალითი შოუს შესახებ გავრცელებული ინფორმაცია საბოლოოდ ქლოი კარდაშიანმა The Late Late Show-ში სტუმრობისას დაადასტურა. ქლოის თქმით, გადაღებები დაწყებულია და ახალი შოუ კარდაშიან-ჯენერების ყოველდღიურ ცხოვრებაზე მოგვიყვება.

ქლოიმ ისიც აღნიშნა, რომ 2007 წლიდან ოჯახს გადაღებების გარეშე გადაბმულად 6 კვირაზე დიდხანს არ უცხოვრია, ამიტომ 6-თვიანი პაუზა უცნაური, თუმცა, გარკვეულწილად, სასიამოვნოც აღმოჩნდა. აღსანიშნავია, რომ ქლოიმ რამდენიმე თვის წინ ისიც აღნიშნა, რომ რეალითი შოუს დასრულების შემდეგ ოჯახის წევრები ერთმანეთთან ნაკლებ დროს ატარებდნენ და ერთად ყოფნა ძალიან ენატრებოდათ.

"მიუხედავად იმისა, რომ გვერდიგვერდ ვცხოვრობთ და ერთმანეთით უცნაურად ვართ შეპყრობილნი, ერთად ყოფნაში რომ ფულს გვიხდიან, მაგას რა სჯობს", — განაცხადა The Late Late Show-ში სტუმრობისას ქლოიმ.

ქლოის თქმით, გადაღებები ყველაზე მეტად კრის ჯენერს ენატრებოდა, რომელიც ოჯახის წევრებს ახალი პროექტის დაწყებას სთხოვდა. ქლოის ნათქვამი დარბაზში მჯდომმა კრისმაც დაადასტურა.

როგორც ჩანს, Hulu კარდაშიან-ჯენერების ოჯახის წევრებს ერთმანეთთან მეტი დროის გატარებაში დაეხმარება, ჩვენ კი მსოფლიოში ყველაზე ცნობილი ოჯახის ყოველდღიურობა თავს აღარ მოგვანატრებს.

ამავე თემაზე:

ბოლო ამბები:

გირჩევთ