დანიის არქიტექტურისა და დიზაინის სამეფო აკადემია ონში ფილიალს ხსნის. აღნიშნულზე ინფორმაციას ონის მუნიციპალიტეტის მერია ავრცელებს.

"ჩვენი ქალაქისათვის და ქვეყნისათვის მიღებულ ამ ისტორიულ გადაწყვეტილებას წინ უძღოდა ონის მუნიციპალიტეტის მერიის ინტენსიური მოლაპარაკებები როგორც ხსენებულ აკადემიასთან, ისე შესაბამის დონორ ორგანიზაციებთან. მოლაპარაკების წარმატებით დასრულების პროცესში მნიშვნელოვანი როლი შეასრულა დანიის სამეფოში საქართველოს საპატიო კონსულმა და რაჭის დიდმა მეგობარმა, ქალბატონმა მარიანა ბოლსმა", — აცხადებენ მუნიციპალიტეტის მერიაში.

მათივე ცნობით, განსაკუთრებით სასიამოვნოა, რომ სამეფო აკადემიის ონის ფილიალის გახსნისთვის დანიის მთავრობის მიერ საწყის ეტაპზე 1 მილიონი დანიური კრონა გამოიყო.

მერიის ინფორმაციით, სამეფო აკადემიის შესაბამისი დელეგაცია ქალაქს სამუშაო ვიზიტით ოქტომბრის ბოლოს ეწვევა, რა დროსაც განისაზღვრება სამეფო აკადემიის ონის ფილიალის დაფუძნებისთვის საჭირო ღონისძიებები.