ამერიკის შეერთებული შტატების ხელისუფლება მუშაობს ახალ აკრძალვებზე, რომელიც შეეხება აშშ-ს მიმართულებით მოძრავი თვითმფრინავების მგზავრებს. კერძოდ, ეროვნული უსაფრთხოების სამსახური, "ტერორიზმის საფრთხის გამო" გეგმავს, რომ ზოგიერთი ქვეყნის ავიაკომპანიის მგზავრებს არ მისცეს მობილურზე დიდი ზომის ელექტრონული მოწყობილობის თვითმფრინავში ატანის უფლება. შეზღუდვა არ შეეხება მობილურებსა და სამედიცინო დანიშნულების, მაგრამ შესაბამისი სამედიცინო ცნობის მქონე ელექტრონულ მოწყობილობებს.

თვითმფრინავის სალონში აკრძალული მოწყობილობების გადატანა მგზავრებს ე.წ. ჩასაბარებელი ბარგით შეეძლებათ.

როგორც Reuters სახელისუფლებო წყაროზე დაყრდნობით წერს, შესაძლო აკრძალვის მიზეზი გახდა უშიშროების სამსახურების მიერ რამდენიმე კვირის წინ მოპოვებული ინფორმაცია შესაძლო თავდასხმების შესახებ. აკრძალვა, სავარაუდოდ, შეეხება აფრიკის, ახლო აღმოსავლეთისა და აზიის რამდენიმე ავიაკომპანიას.

მოსალოდნელი შეზღუდვების შესახებ ტვიტერის საშუალებით მომხმარებლებს აცნობა იორდანიის სამეფო ავიახაზებმა, თუმცა, მოგვიანებით აღნიშნული ტვიტი წაიშალა. აკრძალვები, დიდი ალბათობით, შეეხება საუდის არაბეთის ავიაკომპანიის მგზავრებსაც. ჯერჯერობით, აღნიშნულ ცნობებში არაფერია საუბარი თურქეთის ავიახაზების შესახებ, რომელსაც საქართველოდან აშშ-ს მიმართულებით წასვლის მსურველები, აქტიურად იყენებენ.

როგორც ამერიკული მედია წერს, შეზღუდვები არ გავრცელდება ამერიკულ ავიაკომპანიებზე. სავარაუდოდ, ეს აკრძალვა არ შეეხება თბილისიდან მიუნხენის გავლით შესრულებულ რეისებს, რადგან ავიაკომპანიის მგზავრები მიუნხენიდან ამერიკულ United-ს გადაჰყავს. იმ ავიაკომპანიების ზუსტი სია, რომელიც აკრძალვაში მოჰყვება მიმდინარე კვირას გავრცელდება.