შინიჩირო ვატანაბეს საკულტო ანიმე Cowboy Bebop სულ მალე ეკრანებზე სერიალის სახით დაბრუნდება. ნეტფლიქსმა ახალი სერიალის პირველი კადრები აგვისტოში გაავრცელა. ცოტა ხნის წინ კი სერიალის ინტრო გავრცელდა, რომელიც ორიგინალი ანიმეს ინტროს თითქმის ზუსტად იმეორებს.

ნეტფლიქსის ახალ სერიალში მთავარ როლებს ჯონ ჩო, მუსტაფა შაკირი და დანიელა პირედა შეასრულებენ. რაც მთავარია, სერიალის შექმნაში თავად შინიჩირო ვატანაბეა ჩართული, ხოლო ახალი პროექტისთვის მუსიკა Cowboy Bebop-ის ანიმეს კომპოზიტორმა იოკო კანომ დაწერა. სერიალის პრემიერა ნეტფლიქსზე 19 ნოემბერს შედგება.

ფოტო: Netflix

აღსანიშნავია, რომ სერიალის შემქმნელების მიხედვით, ახალი ვერსია ანიმეს ზუსტი რიმეიქი არ იქნება. პროდიუსერების თქმით, სერიალი პერსონაჟების შესახებ უამრავ კითხვას გასცემს პასუხს, რომელიც ანიმეს ნახვის შემდეგ გულშემატკივრებს დარჩათ.

ფოტო: Netflix

"ვფიქრობ, ანიმეს უბრალოდ ხელახლა გადაღება მაყურებელს უკმაყოფილოს დატოვებდა, რადგან ეს ყველაფერი უკვე ნახეს. ანიმე საოცარი აღმოჩნდა. ჩვენ არ ვართ ვალდებული, ზუსტად იგივე შედეგი წარმოვადგინოთ. ვფიქრობ, ასე რომ მოვქცეულიყავით, ყველა იმედგაცრუებული დარჩებოდა", — ამბობს სერიალის მთავარი პროდიუსერი.

ფოტო: Sunrise

Cowboy Bebop მაყურებლებმა პირველად 1998 წელს იხილეს. ის კოსმოსში საშიშ კრიმინალებზე მონადირე სპაიკსა და მის მეგობრებზე მოგვითხრობს, რომლებიც საკუთარი წარსულისგან გაქცევას ცდილობენ. თამამად შეიძლება ითქვას, რომ საინტერესო ისტორიის, პერსონაჟებისა და გამორჩეული მუსიკის წყალობით, ანიმე პოპულარულობას დღემდე არ კარგავს. რამდენად გაამართლებს ნეტფლიქსი გულშემატკივრების მოლოდინებსა და იმედებს, ამას მხოლოდ დრო გვიჩვენებს.

ამავე თემაზე: