პარლამენტის პირველი ვიცე-სპიკერის, გია ვოლსკის აზრით, ცაგერში ექსპრემიერ გიორგი გახარიას თანაპარტიელის მანქანის დაცხრილვა "უცხოელების ყურადღებაზე გათვლილი აქციაა".

"ვერც ერთი ჭკუათმყოფელი ვერ დაიჯერებს, რომ ცაგერში მომხდარი თავდასხმა მმართველი გუნდის მხარდამჭერებმა ჩაიდინეს. აღარ ავხსნი რატომ. საფუძველი მაქვს ვიფიქრო, რომ ეს უცხოელების ყურადღებაზე გათვლილი აქციაა! ერთი, რომ ქვეყანაში არსებული გარემო, ქართული საზოგადოება ველურად წარმოადგინოს — საერთაშორისო ტრიბუნიდან პრემიერი მაღალ რეიტინგებზე და დემოკრატიაზე საუბრობს, აქ კი ისვრიან! და მეორე, პროგრამა მაქსიმუმი — იქნებ, მმართველი პარტიისაკენ გამოიშვიროს ვინმემ ხელი", — წერს ვოლსკი Facebook-ზე.

დღეს, 25 სექტემბერს, ცაგერში გახარიას პარტიის, საქართველოსთვის მერობის კანდიდატის მანქანა დაცხრილეს. როგორც ბესარიონ ბენდელიანი On.ge-სთან ამბობს, წუხელ ავტომობილი სახლთან დაახლოებით 00:00 საათისთვის სახლთან გააჩერა, დილით კი დაცხრილული დახვდა. პარტიის თავმჯდომარის მოადგილის, ნათია მეზვრიშვილის განცხადებით, აღნიშნულზე სრული პასუხისმგებლობა ქართული ოცნების ხელმძღვანელობას ეკისრება.

შინაგან საქმეთა სამინისტროს ინფორმაციით, გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.