პარტია საქართველოსთვის თავმჯდომარის მოადგილე, ნათია მეზვრიშვილი ამავე პარტიის მერობის კანდიდატის, ბესო ბენდელიანის მანქანის დაცხრილვაზე პასუხისმგებლობას ქართული ოცნების ხელმძღვანელობას აკისრებს. მისი თქმით, პარტია წინასაარჩევნო კამპანიას, პრაქტიკულად, ვერ ატარებს.

"კობახიძეს, კალაძეს, ღარიბაშვილს, რომლებიც ყოველდღიურ რეჟიმში ძალადობას ამართლებენ და ახალისებენ სიძულვილის ენას. პასუხისმგებლობა ეკისრება შინაგან საქმეთა მინისტრ გომელაურს, გენერალურ პროკურორ შოთაძეს, რომლებიც პირდაპირი მნიშვნელობით არ გაინძრნენ — თვეებია ეს ადამიანები დანაშაულს ვერ ხედავენ და არ რეაგირებენ სისტემურ დანაშაულზე, რაზეც განცხადება რამდენიმე დღის წინ ოფიციალურად შევიტანე", — განაცხადა მეზვრიშვილმა.

მისივე თქმით, პარალელურ რეჟიმში გრძელდება მათ კანდიდატებზე ზეწოლა და მუქარა, ხოლო მხარდამჭერებს ემუქრებიან სოციალური დახმარებების მოხსნით.

"გუშინ ავტომანქანის საბურავები დაუშვეს ლაგოდეხის საკრებულოს კანდიდატ სალომე ღონღაძეს; რამდენიმე დღის წინ, ასპინძაში, მერის მოვალეობის შემსრულებელი და სხვა მოხელეები თავს დაესხნენ საკრებულოს კანდიდატს; მთელი ქვეყნის მასშტაბით აზიანებენ და ანადგურებენ პარტიის სააგიტაციო მასალას, კერძოდ, პლაკატებსა და ბანერებს, რაშიც მონაწილეობენ მუნიციპალიტეტის ორგანოები", — ამბობს მეზვრიშვილი.

ამასთან, მან ისაუბრა ხელისუფლების მხრიდან გიორგი გახარიას წინააღმდეგ "ცილისწამების უპრეცედენტო კამპანიაზე", საუბარია ნარკოტიკების მოხმარების ბრალდებაზე.

ცაგერში გახარიას პარტიის, საქართველოსთვის მერობის კანდიდატის მანქანა დაცხრილეს. როგორც ბესარიონ ბენდელიანი On.ge-სთან ამბობს, წუხელ ავტომობილი სახლთან დაახლოებით 00:00 საათისთვის სახლთან გააჩერა, დილით კი დაცხრილული დახვდა. ის დარწმუნებულია, რომ მანქანას პოლიტიკური საქმიანობის გამო ესროლეს.

შინაგან საქმეთა სამინისტროს ინფორმაციით, გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.