საქართველოს ექსპრეზიდეტის, მიხეილ სააკაშვილი განცხადებით, ის აუცილებლად შეასრულებს ქვეყანაში ჩამოსვლასთან დაკავშირებით დადებულ პირობას, თუმცა, თუ "ხალხმა ხელი არ გაანძრია", მხოლოდ ის ვერაფერს უშველის. სააკაშვილის მტკიცებით, ხალხის მოქმედების გარეშე არც საერთაშორისო ზეწოლა იქნება სერიოზული.

"[ხალხი ამბობს] "ამერიკელემა თუ არ შემოიღეს სანქციები, არაფერი არ გვეშველება". თუ ხელი არ გავანძრიეთ ამერიკელები არ შემოიღებენ სანქციებს; "მიშა თუ არ ჩამოვა, არაფერი არ გვეშველება" — მე, რა თქმა უნდა, შევასრულებ იმას, რაც ვთქვი, მაგრამ თუ ხელი არ გავანძრიეთ არანაირად, [...] მიშას აქვს ორი ხელი და ორი ფეხი და ერთი პირი და იმ პირსაც დააფარებენ ორ წუთში, უპრობლემოდ", — ამბობს სააკაშვილი.

მისივე თქმით, ქართული ოცნების მიერ შარლ მიშელის დოკუმენტის ანულირება ქვეყნისთვის წარმოუდგენელი ისტორიული სირცხვილია, ხოლო ხალხმა ხელისუფლება 2 ოქტომბრის შედეგად დანიშნული ვადამდელი არჩევნებით უნდა შეცვალოს.

"ახლა ამერიკის კონგრესში ყველა მეუბნება, ჩვენ დავიღალეთ საქართველოთი და ისმის ერთი და იგივე ფრაზა, ძაან გვიყვარს საქართველო, მაგრამ თუ ქართველ ხალხს თვითონ არ უნდა თავისუფლება და ნორმალური დემოკრატიული სისტემა, ჩვენ რა ვუშველოთ, ჩვენ გვაქვს ბევრი სხვა პრობლემა მსოფლიოში", — აღნიშნავს სააკაშვილი.

მიხეილ სააკაშვილმა 6 სექტემბერს კიდევ ერთხელ განაცხადა, რომ საქართველოში ჩამოვა, თუმცა თარიღს ისევ არ აკონკრეტებს. მისი თქმით, თარიღსა და მარშრუტთან დაკავშირებით მოსახლეობას საქმის კურსში მაშინ ჩააყენებს, როცა ყველაფერი ხელთ ექნება.

ეს პირველი შემთხვევა არ არის, როდესაც სააკაშვილი საქართველოში დაბრუნებაზე საუბრობს. იმავეს ამბობდა ის წინა არჩევნების პერიოდშიც და ეს რამდენჯერმე დააანონსა 2 ოქტომრბის თვითმმართველობის არჩევნებამდე. მას ზუსტი თარიღი არც აქამდე უთქვამს, თუმცა აცხადებდა, რომ პირობას შეასრულებდა და "რეფერენდუმის" წინ საქართველოში ჩამოვიდოდა.