ნამახვანჰესის მოწინააღმდეგე აქტივისტის, ვარლამ გოლეთიანის განცხადებით, პასუხისმგებლობა ხელისუფლებას ეკისრება იმ ნაწილშიც, რა ზარალსაც ბიუჯეტი მიიღებს ENKA-ს მიერ ხელშეკრულების შეწყვეტის მოთხოვნის შემდეგ. ამის შესახებ მან ვიდეო მიმართვაში ისაუბრა.

"მკაფიოდ და ცალსახად გვინდა ვთქვათ, რომ პასუხისმგებლობა ეკისრება ხელისუფლებას, იმ ნაწილშიც, ახლა რა ზარასლაც ბიუჯეტი და შესაბამისად, ჩვენ, ხალხი მივიღებთ და დაგვეკისრება ამ ყველაფრისგან. იმიტომ, რომ რატომ მოეწერა ამ ხელშეკრულებას ხელი, ამაზე პასუხი უნდა აგონ იმ პირებმა, ვინც ხელი მოაწერეს [...] რაც არ უნდა ვექტორები სხვა მისამართით გადაიტანონ, ეს ჩვენ ვიქნებით, თუ რომელიმე სხვა ჯგუფი საზოგადოების, ამას მათ არავინ არ გაუტარებს და ვერ შეძლებენ იმას, რომ ასე შემოაბრუნონ ეს საკითხი", — განაცხადა მან.

ხელშეკრულების შეწყვეტის შემდეგ ფინანსურ ზარალზე საუბარს გოლეთიანი "პრიმიტიულ პიარ კამპანიას უწოდებს" და ამბობს, რომ ქვეყანას უფრო მეტი ზიანი მიადგებოდა შეთანხმებაში დარჩენით, ვიდრე მისი გაწყვეტით. გოლეთიანის თქმითვე, "არ ეშინიათ", თუ მათი პასუხისგების საკითხი დადგება, რადგან შეუძლიათ, "ნებისმიერ ინსტანციაზე დაასაბუთონ, რომ ეს ხელშეკრულება არის კაბალური.

"პოზიციაც და ოპოზიციაც არის ერთ აზრზე, დაგვცინიან, ჩვენ როგორც ბნელებს, გამოქვაბულში დაბრუნების მსურველებსა და სანთლის შუქის მსურველ ხალხს ასე გვიხსენიებენ, მაგრამ დარწმუნებული ვარ, საზოგადოება, ვინც ჩართულია ამ პროცესში, ყველა კარგად ხედავს, რამხელა პროცესები მიდის სინამდვილეში დღეს და რა ნაბიჯებს ვდგამთ ქვეყნის სასარგებლოდ", — განაცხადა მან.

დღეს, 22 სექტემბერს ცნობილი გახდა, რომ ENKA საქართველოს მთავრობასთან ხელშეკრულებას წყვეტს და ნამახვანჰესს აღარ ააშენებს. აღნიშნული სტამბულის საფონდო ბირჟაზე გავრცელებულ განცხადებაშია ნათქვამი.

17 სექტემბერს ნამახვენჰესის მშენებლობის მოწინააღმდეგეებმა 3-თვიანი დახურული მოლაპარაკებების შემდეგ ხელისუფლებასთან მედიაციის პროცესი დატოვეს. მედიაცია პარტნიორ ქვეყნებთან ერთად მიმდინარეობდა. მთავრობამ ნამახვანჰესთან დაკავშირებულ დისკუსიებში ევროკავშირის ენერგეტიკული გაერთიანების წარმომადგენლის ჩართვის შესახებ გადაწყვეტილება 24 აპრილს გაასაჯაროვა.

რიონის ხეობის აქტივისტებისგან განსხვავებით, ნამახვანჰესის კასკადის აუცილებლობასა და წარმატებაზე საუბრობდა ხელისუფლება. ეკონომიკის სამინისტროს არაერთხელ განუცხადებია, რომ ეს პროექტი ქვეყნის ენერგოდამოუკიდებლობისკენ და უსაფრთხოებისკენ ერთ-ერთი აუცილებელი ნაბიჯია.

"ვალდებულებათა უმრავლესობა ეხება საქართველოს მთავრობას", "საჭიროა დამატებით შეფასდეს შესაბამისი უწყებების მიერ", "მოკლებულია ლოგიკურ საფუძველს" — ეს ფრაზები, რომელიც 25 მაისს გასაჯაროებულ დოკუმენტში იკითხება, სავარაუდოდ, იუსტიციის სამინისტრომ საქართველოს მთავრობას, კერძოდ კი ეკონომიკის მინისტრის მაშინდელ მოადგილეს, ნათია თურნავას მისწერა.

დოკუმენტი, რომელიც მთის ამბებმა გააასაჯაროა, 2019 წლის 30 მარტით არის დათარიღებული, ანუ ენკასა და მთავრობას შორის ხელშეკრულების გაფორმებამდე დაახლოებით 1 თვით ადრე და სწორედ ამ ხელშეკრულების მიზანშეწონილობას განიხილავს. კერძოდ, დოკუმენტი მოიცავს 22 პუნქტს, რომელშიც განხილულია ხელშეკრულებაში არსებული უზუსტობები და მუხლები, რომელიც სჯობს დაზუსტდეს ან შეიცვალოს.