ტომი და ჯერი ანიმაციაში დღეებს ერთმანეთის დევნასა და წვალებაში ატარებენ, თუმცა ზოგჯერ საერთო მტრის წინაშე ერთიანდებიან ან ჩუმ-ჩუმად ერთმანეთს ეხმარებიან. როგორც ჩანს, კატასა და თაგვს შორის მეგობრობა არც რეალობაშია წარმოუდგენელი. ამის დასტური ჩილეში მცხოვრები შავი კატა, სახელად საიმონია, რომელმაც თაგვის დაჭერას მასთან დამეგობრება არჩია.

საიმონმა ინტერნეტის ყურადღება მას შემდეგ მიიპყრო, რაც მისმა პატრონმა, ბენჟამინ საგრედომ ვიდეო დადო, რომელშიც საიმონი წყალს ჯამიდან თაგვთან ერთად სვამს. პატრონი კატას თაგვის დაჭერას სთხოვს, თუმცა კატას მისი ბრძანების შესრულება აზრადაც არ მოსდის. საიმონი თათს ახალი მეგობრისკენ რამდენჯერმე იშვერს და თაგვს წყლის დალევის უფლებას აძლევს.

ბენჟამინმა საიმონის მეგობარ თაგვს შეფჩიტო დაარქვა. მისი თქმით, თაგვი სახლში რამდენჯერმე დაბრუნდა.

"გვიხარია, რომ საიმონმა ის მიიღო. საიმონი ძალიან მოსიყვარულე და კომუნიკაბელური კატაა. თუ შეფჩიტო ისევ მოვა, მისი დატოვება მოგვიწევს", — ამბობს ბენჟამინი ხუმრობით.

ბენჟამინმა აღნიშნა, რომ საიმონი ორ ძაღლთან ერთად გაიზარდა და ხასიათითაც მათ ჰგავს. პატრონის თქმით, კატა ძალიან მოსიყვარულეა, თუმცა მისი თაგვთან დამეგობრება მაინც გაუკვირდა.

ვინ იცის, იქნებ საიმონისა და შეფჩიტოს შესახებ მალე ახალი ანიმაციაც ვიხილოთ?!