ახალგაზრდა იურისტთა ასოციაციის თავმჯდომარე ნიკა სიმონიშვილი აცხადებს, რომ ქართული ოცნების წარმომადგენლებისგან გასაკვირი არ არის ის ძალადობრივი ქმედება, რომელიც მთავარი არხის ოპერატორის წინააღმდეგ ჩაიდინეს. მისი თქმით, მსგავსი ქმედებები არის შედეგი იმ აგრესიული რიტორიკისა, რომელიც ხელისუფლებას მედიის წინააღმდეგ აქვს.

"ძალიან სამწუხარო და ძალიან საშიში ფაქტი მოხდა ის, რაც ჩვენ გავიგეთ. რა თქმა უნდა, ეს არის შედეგი იმ რიტორიკისა, რომელიც აქვს ხელისუფლებას კრიტიკულ მედიასთან მიმართებით; იმ რიტორიკის, სიძულვილის ენისა და ძალადობის წახალისებისა, რომელიც აქვს მათ შორის პრემიერმინისტრს და ქართული ოცნების სხვა წარმომადგენლებს. ისინი პირდაპირ ახალისებენ ამ ძალადობას და ფაქტობრივად, საშინელებაა ამას რომ ვამბობთ, მაგრამ არ არის გასაკვირი, რომ მმართველ პარტიაში შეკრებილმა გარკვეულმა პირებმა, აი, ეს ძალადობრივი ქმედება ჩაიდინეს" — აცხადებს საიას თავმჯდომარე.

მთავარი არხის ინფორმაციით, ქარელში, ქართული ოცნების წევრებმა მათი ოპერატორი პარტიის შტაბის მეორე სართულიდან გადმოაგდეს. როგორც ჟურნალისტი ბექა ყორშია ყვება, მმართველი პარტიის შტაბის წევრები მისვლისთანავე აგრესიულად შეხვდნენ. მისი თქმით, იყო ფიზიკური დაპირისპირებაც.

ინციდენტის შემდეგ, ქართული ოცნების ოფისში სპეციალური ბრიფინგი გაიმართა, სადაც პარტიის აღმასრულებელმა მდივანმა, მამუკა მდინარაძემ განაცხადა, რომ მთავარი არხის ოპერატორი პარტიის ქარელის შტაბის მეორე სართულიდან შემთხვევით გადმოვარდა. ის ადასტურებს, რომ შტაბის წევრებსა და ტელევიზიის გადამღებ ჯგუფს შორის სიტყვიერი დაპირისპირება იყო, თუმცა გამორიცხავს ფიზიკურ შეხებას.

საქმეზე გამოძება სისხლის სამართლის კოდექსის 124-ე მუხლით დაიწყო, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით.