საქართველოს ეროვნული ბიბლიოთეკის დირექტორმა, მწერალმა გიორგი კეკელიძემ გურული დღიურებიდან მიღებული ჰონორარი სოციალურად დაუცველ ოჯახს გადაურიცხა.

"ამ სამი ბავშვის სიხარულზე დიდია ჩემი სიხარული. ორი მათგან, ლია და ნია გეგიაძე - პატარები - დროებით სოციალურად დაუცველი ოჯახიდან არიან, ერთიც, ცოტა უფროსი, წარჩინებული მოსწავლე ქეთი ქობულაძე. მადლობა გურული დღიურების ფონდში ჩემს თანამოაზრეებს, მადლობა ყველა შემომწირველს და მადლობა შენ, მკითხველო! რომ არა შენ - არაფერი გამოვიდოდა. სულ საათით ჩავედი დაჯილდოებაზე და ახლა უკან ვბრუნდები, დილით თბილისში კონფერენციაზე უნდა ვიყო. გზა გრძელია, მაგრამ მე უფრო ძლიერი ვარ, ვიდრე შუადღისას ვიყავი", - წერს გიორგი კეკელიძე.

ეს პირველი შემთხვევა არ არის, როცა ქართველი მწერალი საკუთარ ჰონორარს ქველმოქმედებაში ხარჯავს, მწერალმა სალომე ბენიძემ რომანიდან ქალაქი წყალზე, რომლისთვისაც წინანდლის პრემიის ლაურეატი გახდა, აღებული პირველი ჰონორარი მთლიანად ძუძუს კიბოსთან მებრძოლ ქალებს გადაურიცხა.