მთავარი არხის თარგმანის მიხედვით, ევროპარლამენტარი ანდრიუს კუბილიუსი ამბობს, რომ თუ ქართული ოცნება ადგილობრივ თვითმმართველობის არჩევნებში 43%-ს ვერ აიღებს, ევროკავშირი რიგგარეშე არჩევნების დასანიშნად ზეწოლას მოახდენს.

"გვსურს ვიხილოთ შემდეგი, ის პოლიტიკური შეთანხმება, რომელიც მიღწეული იქნა ყველა პოლიტიკური პარტიის მიერ, უნდა შესრულდეს. ეს არის საფუძველი შემდგომი ნაბიჯებისა, რომელიც საქართველოში უნდა გადაიდგას. თუ ქართული ოცნება ამ ადგილობრივ არჩევნებში 43% ვერ დააგროვებს, მაშინ ევროკავშირი ზეწოლას მოახდენს მასზე, რომ დაინიშნოს რიგგარეშე არჩევნები, როგორც ამ შეთანხმებაში იყო გათვალისწინებული", — განაცხადა კუბილიუსმა მთავარი არხის თარგმანის მიხედვით.

კუბილიუსმა, ასევე, ისაუბრა მიხეილ სააკაშვილთან შეხვედრაზე და თქვა, რომ მისი ჩამოსვლა საქართველოში კრიზისს კიდევ უფრო გააღრმავებს.

"რა თქმა უნდა, ჩვენ გვესმის, რომ მას სურვილი აქვს საქართველოში დაბრუნების, მაგრამ, მგონია, რომ ამ ეტაპზე ეს კრიზისს კიდევ უფრო გააღრმავებს", — ამბობს ანდრიუს კუბილიუსი.

ევროპარლამენტარის თქმით, 8 მარტისა და 19 აპრილის შეთანხმებების დროს იყო შანსი, კრიზისიდან გამოსულიყო საქართველო, თუმცა დაამატა, რომ ეს ვერცერთ შემთხვევაში მოხერხდა.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.