ქართული ოცნების თავმჯდომარე, ირაკლი კობახიძე ისე მედიას ესხმის თავს. ამჯერად, საქმე ეხება გავრცელებულ ფაილებს, რომელთა "ფაბრიკაციაში" კობახიძე კრიტიკულ მედიას და ნაციონალურ მოძრაობას ადანაშაულებს. კობახიის თქმით, მათი მიზანი ოცნების უკანონო მოსმენებში დადანაშაულება და პოლიტიკური პირების პირადი ცხოვრების გასაჯაროება იყო.

"სცენარი იყო ის, რომ მათ გაავრცელეს ტყუილ-მართალი, ასეც შეიძლება ითქვას, გუშინდელი დღიდან, რომ შეექმნათ გარკვეული განცდა, თითქოს ტარდება უკანონო მოსმენები ჩვენს ქვეყანაში და ამ ფონზე მათ გაევრცელებინათ ფარული ჩანაწერები, რომელიც ასახავდა პოლიტიკური პირის ან პირების პირად ცხოვრებას. [...] ეს იყო გარყვნილი ნიკა გვარამიას, გარყვნილი ნოდარ მელაძის, დიანა ტრაპაიძის, ინგა გრიგოლიის და ა.შ. ამ გარყვნილი ადამიანების გეგმა", — აცხადებს კობახიძე.

კობახიძის თქმით, მათ "გარყვნილი ადამიანების გეგმა ამხილეს", შესაბამისად, "ისარი იქით არის მიმართული, საითაც უნდა იყოს".

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: