ადამიანის უფლებათა ცენტრის ინფორმაციით, სტრასბურგის სასამართლომ 2019 წლის 20-21 ივნისის მოვლენებთან დაკავშირებული კიდევ ერთი საჩივარი მიიღო. როგორც ადამიანის უფლებათა ცენტრში განმარტავენ, მათ მიერ მომზადებული კიდევ ერთი სარჩელი სახელწოდებით Berikashvili vs Georgia სასამართლომ უკვე დაარეგისტრირა. შსს-ს მიერ დარბეულ დემონსტრაციაზე დაზარალებული მოქალაქე ევროპული კონვენციის მე-3, მე-10, მე-11 და მე-13 მუხლების დარღვევის დადგენას ითხოვს.

ვახტანგ ბერიკაშვილი, რომლის სამართლებრივ ინტერესებს 2019 წლიდან ადამიანის უფლებათა ცენტრი იცავს, 2019 წლის 20 ივნისს იმყოფებოდა პარლამენტის წინ გამართულ საპროტესტო აქციაზე, რათა საქართველოში მიმდინარე პროცესებთან დაკავშირებით მშვიდობიანი პროტესტი გამოეხატა.

არასამთავრობო ორგანიზაციის განცხადებით, შსს-ს მიერ ამ აქციის არაპროპორციული ძალის გამოყენებით დარბევის შედეგად ვახტანგ
ბერიკაშვილმა მიიღო ჯანმრთელობის მნიშვნელოვანი დაზიანებები სპეცრაზმელების
მიერ ნასროლი სავარაუდოდ პლასტმასისა და კაუჩუკის შემცველი გაურკვეველი
წარმოების ტყვიისაგან, რომელიც მისი სხეულიდან — მხრის მიდამოდან სამედიცინო დაწესებულებაში ამოიღეს.

"მისი სხეულიდან ამოღებული ტყვიის კადრი მედიაშიც არაერთხელ გავრცელდა, რითაც დემონსტრანტებზე სასტიკად მოპყრობის ფაქტი დასტურდებოდა. მიყენებული ჭრილობის გარდა, ვახტანგ ბერიკაშვილმა ძლიერი ემოციური სტრესი განიცადა, როდესაც ხედავდა, სამართალდამცავები როგორი დამიზნებით ესროდნენ აქციის მონაწილეებს რეზინის ტყვიებს", — აცხადებს ორგანიზაცია.

მათივე თქმით, ვახტანგ ბერიკაშვილი საგამოძიებო ორგანოების მიერ დაზარალებულად ცნობილი დღემდე არ არის.

ადამიანის უფლებათა ცენტრი 20 ივნისის მოვლენებისას დაზარალებულ
კიდევ სამ მოქალაქეს იცავს. მათ დაზარალებულის სტატუსი პროკურატურამ მხოლოდ
მას შემდეგ მიანიჭა, რაც სტრასბურგის სასამართლომ საჩივარი დაარეგისტრირა და
ხელისუფლებასთან კომუნიკაცია დაიწყო. სწორედ იმ პერიოდში ცენტრმა კიდევ ერთხელ
მოითხოვა ვახტანგ ბერიკაშვილისთვის დაზარალებულის სტატუსის მინიჭება, მაგრამ
წინა საქმეებზე არსებული გამოცდილების მიუხედავად, პროკურატურისგან კვლავ უარი
მიიღო.