Met Gala-ზე ვარსკვლავები თვალისმომჭრელი, ექსცენტრიული და ზოგჯერ უცნაური კოსტიუმებით იწონებენ თავს. ერთ-ერთი ცნობილი ადამიანი, რომელიც ღონისძიებაზე მუდამ ყურადღების ცენტრშია, კიმ კარდაშიანია. კიმმა არც წელს გაგვიცრუა იმედი და არაორდინალური კოსტიუმითა და იდუმალი თანმხლები პირით ყველას ყურადღება მიიპყრო.

ფოტო: Theo Wargo

წლევანდელი Met Gala-ს თემა "ზეიმი ამერიკაში — მოდის ლექსიკონი" იყო. ღონისძიებაზე კიმს თავიდან ბოლომდე შავი ტანსაცმელი — ტანზე მომდგარი შავი კაბა და Balenciaga-ს ცნობილი ფეხსაცმელი ეცვა. კიმს სახე შავი ნიღბით ჰქონდა დაფარული და ცხენის კუდად შეკრული თმა ამშვენებდა.

Balenciaga-ს კოსტიუმში გამოწყობილმა ჩვენი დაინტრიგება იმავე სტილით შემოსილი უცნობი თანმხლებითაც შეძლო. თავდაპირველად გულშემატკივრებმა იფიქრეს, რომ უცნობი კანიე ვესტი იყო, თუმცა ონლაინმედია E! News-ს წყარომ უთხრა, რომ კიმს გვერდს სინამდვილეში Balenciaga-ს შემოქმედებითი ხელმძღვანელი დემნა გვასალია უმშვენებდა.

ფოტო: Dimitrios Kambouris/Getty Images for The Met Museum/Vogue

წყარომ მედიას ისიც უთხრა, რომ მართალია კანიე წითელ ხალიჩაზე ფიზიკურად არ იდგა, თუმცა მის იქ ყოფნას ყველა იგრძნობდა:

"სწორედ მან [კანიემ] გააცნო კიმი დემნას და ხელი შეუწყო მასსა და Balenciaga-ს შორის ურთიერთობის დაწყებას...კიმის ლუქი სუბკულტურასა და მოდაში ახალი განაცხადია. არანაირი ლოგო და სახე, თუმცა ყველამ იცის, რომ ისაა", — უთხრა წყარომ E! News-ს.

ფოტო: Mike Coppola/Getty Images

აღსანიშნავია, რომ Met Gala-მდე კიმ კარდაშიანი საზოგადოების წინაშე მსგავსი სტილის კოსტიუმით გამოჩნდა. კიმს თავით-ფეხამდე ტყავის შავი სამოსი ეცვა.

ფოტო: kimkardashian / Instagram

შავი SUV-დან გადმოსვლის შემდეგ გადაღებულ ფოტოებში, რომელიც კარდაშიანმა თავის ინსტაგრამზეც გამოაქვეყნა, ჩანს, რომ მან გრძელ შავ პალტოს ამავე ფერის ხელთათმანები და მაღალყელიანი ფეხსაცმელი შეუხამა. ყველაზე თვალშისაცემი კი მისი ერთგვარი პირბადეა, რომელიც კიმს მთელ სახეს უფარავდა — ერთადერთი "გამოსასვლელი" კოსტიუმს კეფის ადგილას, ცხენის კუდად შეკრული თმისთვის ჰქონდა დატოვებული.

ამავე თემაზე: