ქართული ოცნების აღმასრულებელი მდივანი, მამუკა მდინარაძე გავრცელებულ ფაილებს ფაბრიკაციას უწოდებს და მათ ნაციონალურ მოძრაობასთან აკავშირებს. ის ამბობს, რომ ფარული თვალთვალი ენმ-ს ხელწერაა.

"ფარული თვალთვალი და მოსმენა, ადამიანების პირად ცხოვრებაში ჩარევა და ცრუ ბრალდებების "შეკერვა", ხელისუფლებაში ყოფნის დროს გაკეთებული ჩანაწერების ოპოზიციაში ყოფნის დროს გამოქვეყნება უკვე წლებია ამ პოლიტიკური ძალის ხელწერად იქცა. თუმცა, ამ მეთოდებით მათ ვერც სახელმწიფოა და ვერც ეკლესიის დისკრედიტაცია ვერ შეძლეს. ეს მათ არ გამოუვათ არც მომავალში", — განაცხადა მდინარაძემ.

ის უშვებს, რომ გავრცელებულ ფაილებში, შესაძლოა იყოს რეალური ფაქტებიც.

"თავად თაწერეს, თავად ავრცელებენ, თავად ჭრიან და კერავენ, თავად ამზადებენ ამ ჩანაწერებისგან ფაბრიკაციას და ჩვენ ვნახეთ რამდნეიმე წუთის წინ — თავადვე ადასტურებენ. სხვას ამის დადასტურება არ შეუძლია. თუკი სადმე ამ ინფორმაციაში რეალური ინფორმაციაც, შემდეგ ფაბრიკაციის სახით გავრცელებული, რა თქმა უნდა, გამოერევა, ესეც ნაწილი გახდება — როდის იქნა ჩაწერილი, ვინ ჩაწერა, რა მიზნით ჩაწერა, რატომ ჩაწერა, როგორ დაამონტაჟა და ა.შ.", — განაცხადა მამუკა მდინარაძემ.

დღეს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

გავრცელებულ ჩანაწერებთან დაკავშირებით ინფორმაციის მისაღებად On.ge სუს-თან დაკავშირებას შეეცადა. უწყების პრესსამსახურში, ჯერჯერობით, ჩვენს ზარებს არ პასუხობენ. მათ პასუხს მიღებისთანავე შემოგთავაზებთ.

გაიგე მეტი: