დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, თუ ვაქცინაცია არსებული ტემპით გაგრძელდება, შესაძლებელია, წლის ბოლომდე 60%-ამდე ავიდეთ. მისივე თქმით, სასურველი იქნება, თუ ვაქცინაციის დღიური მაჩვენებელი 30 000 იქნება.

"აგვისტოში 23 000 საშუალო დღიური, მთელ აგვისტოში ჩატარდა 715 000 აცრა, თუ ეს არ დაგვივარდა სექტემბერში და ეს არის ჩვენთვის მინიმუმი გეგმის, რომ იგივე მაჩვენებელზე ვიყოთ, სექტემბერში, ოქტომბერში, ნოემბერში. მაშინ, რა თქმა უნდა, ეს გეგმა 60%-იანი თავისუფლად მიღწევადია, მაგრამ ჩვენ ამბიცია უფრო მეტის გვაქვს, არა 60% არამედ მეტი. ამიტომ ხშირად ვაჟღერებ ამას, რომ ძალიან გვინდა სექტემბერში, დღეში იყოს არა 23 000 არამედ 30 000, 35 000 აცრა", — განაცხადა ამირან გამყრელიძემ.

ამირან გამყრელიძემ აღნიშნა, რომ ვაქცინაციის ტემპის შესანარჩუნებლად სხვადასხვა წამახალისებელი ღონისძიებები დაიწყეს, მათ შორის ლატარია.

საკოორდინაციო საბჭოს გადაწყვეტილებით, ვაქცინაციის წამახალისებელი ლატარია დღეს, 13 სექტემბერს დაიწყო.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები