მიმდინარე წლის იანვარ-აგვისტოში საქართველოდან განხორციელებული ექსპორტისა და იმპორტის მოცულობა გაიზარდა. ამის შესახებ ინფორმაციას საქსტატი აქვეყნებს.

როგორც სტატისტიკა აჩვენებს, 2021 წლის იანვარ-აგვისტოში საქართველოდან ექსპორტზე 2,6 მილიარდი დოლარის საქონელი გავიდა, რაც გასული წლის იმავე პერიოდთან შედარებით 25,7%-ით მეტია.

რა შეეხება იმპორტს, მიმდინარე წლის 8 თვეში უცხოეთიდან 6,07 მილიარდი დოლარის საქონელი ვიყიდეთ — ეს მონაცემი 2020 წლის იმავე პერიოდთან შედარებით 20,7%-ით არის გაზრდილი.

ფოტო: საქსტატი

შესაბამისად, იანვარ-აგვისტოში საგარეო სავაჭრო ბრუნვამ, ანუ ექსპორტისა და იმპორტის ჯამმა 8,67 მილიარდ დოლარს მიაღწია, ხოლო უარყოფითი სავაჭრო ბალანსის მოცულობა (ექსპორტსა და იმპორტს შორის სხვაობა) 3,47 მილიარდი დოლარი იყო.

სტატისტიკის მიხედვით, მხოლოდ აგვისტოში 335,3 მილიონი დოლარის საქონელი გავყიდეთ (წლიური ზრდა — 14,6%), ხოლო იმპორტის მოცულობამ 838,3 მილიონ დოლარს (წლიური ზრდა — 26,1%) მიაღწია. აღსანიშნავია, რომ 2021 წელს ექსპორტის მოცულობა ყოველთვიურად იზრდებოდა, თუმცა აგვისტოში, მიმდინარე წლის ივლისთან შედარებით, საქართველოდან უცხოეთში გაყიდული საქონლის ღირებულება 50,7 მილიონი დოლარით არის შემცირებული.