ბათუმში უცხო ქვეყნის მოქალაქე ქალი დაჭრეს. არსებული ინფორმაციით, თავდამსხმელმა თვითდაზიანებები მიიყენა და გარდაიცვალა.

როგორც ექიმმა ჟურნალისტებს განუცხადა, ქალს ჭრილობა ზურგის არეში აქვს მიყენებული და მისი მდგომარეობა ამჟამად სტაბილურია.

"სასწრაფო დახმარების ბრიგადის მიერ არის შემოყვანილი დილის 7 საათსა და 55 წუთზე 33 წლის ქალბატონი, ზურგის არეში მიყენებული ჭრილობით, რომელიც არის გულმკერდის ღრუში შემავალი. ჩაუტარდა პირველადი სამედიცინო დახმარება, დრენირება ფილტვის. ამ წუთში იმყოფება გადაუდებელი თერაპიის განყოფილებაში, მკურნალობის გაგრძელების მიზნით. მდგომარეობა ამ დროისთვის სტაბილურია", — ამბობს ის.

როგორც On.ge-ს შსს-ში განუცხადეს, გამოძიება საქართველოს სისხლის სამართლის კოდექსის 19-108-ე მუხლით დაიწყო, რაც განზრახ მკვლელობის მცდელობას გულისხმობს.