ჩვენს დროში დასაქმებული ცხოველების ამბები ვიღას უკვირს?! პატრონებმა ალბათ იმდენი უჩიჩინეს, ნუ ნაცარქექიობთო, რომ ხან ოპერატორად, ხან პაციენტების მიმსალმებლად და ხანაც თანამშრომლების განწყობაზე მზრუნველად დაიწყეს მუშაობა. თუმცა, ამ ამბის გმირი არცერთია; მისი პოზიცია უფრო სერიოზული და საპასუხისმგებლოა.

ახალი ზელანდიის ერთ-ერთ სკოლაში ქათამი, სახელად ჰენრი, თურმე ავტომესადგომედ აუყვანიათ.

ნიუსტედის დაწყებითი სკოლა ამავე ქალაქის ფერმის მახლობლად მდებარეობს. ფერმის მფლობელი კი სკოლის დირექტორი, ტრეისი ტრიგია. იგი ჰენრის ყოველ დილით აწყობს სპეციალურ მანათობელ ჟილეტში, ქათამი კი ამის შემდეგ ტერიტორიაზე პატრულირებისათვის მიემართება.

მშობლებმა, რომლებსაც ბავშვები მოჰყავთ სკოლაში, ჰენრის შესახებ იციან, ამიტომ მანქანას ფრთხილად და ნელა ატარებენ.

ტრიგის თქმით, ჰენრი გასული წლის მიწურულს იპოვა, როცა ქათამი მეზობლის სახლში შეიპარა და მის ხალიჩაზე მოისაქმა. თუმცა, უკვე პატრონიანმა ჰენრიმ ჩვევა მაინც არ მოიშალა, საქათმიდან გაიქცა და პირდაპირ სკოლის ერთ-ერთ კლასს მიაშურა შესვენებისას. სწორედ მაშინ გაუჩნდა სკოლის დირექტორს და ფერმის მფლობელს იდეა, რომ ჰენრისთვის შესაფერისი, მაგრამ საპასუხისმგებლო საქმე ჩაებარებინა.

ფოტო: Linda Jones

რა გასაკვირია, რომ სკოლის მოსწავლეებსაც და მათ მშობლებსაც ის ძალიან უყვართ. სხვათა შორის, ქათამს, რომელიც ბავშვებს ყოველ დილით, სწავლის დაწყებამდე ესალმება, სახელი სწორედ მოსწავლეებმა შეურჩიეს.

"როცა [მშობლები] მანქანებით მოდიან, ბავშვებს არ უახლოვდებიან, რადგან ჰენრი არ უშვებს", — ამბობს ერთ-ერთი მოსწავლე, მოლი მაკმიურეი, — "მერე კი ცოტა ხნით გასეირნებასაც ვახერხებთ. [ჰენრი] ძალიან მიყვარს".

საკუთარი საქმის პატიოსნად შემსრულებელი ქათამმა კი უკვე თანამშრომლებსაც შეაყვარა თავი; თანაც, იმდენად, რომ დასასვენებელ ოთახშიც კი უშვებენ.

სამუშაო ფორმას რაც შეეხება, ცოტა კი გაჭირდა ქათმის ზომის ჟილეტის პოვნა, თუმცა, საგანგებოდ ჰენრისთვის ის ინტერნეტით გამოიწერეს.

"ძალიან დამჯერად და აუღელვებლად გამოეწყო ჟაკეტში", — ამბობს ტრიგი, — "ახლა კი ყოველ დილას მისი ჩაცმით იწყებს და სადილობამდე ატარებს. სანამ ახლომახლო ყველი ეგულება, მანამდე შეუძლია, ასე გაბადრულს ეცვას".