ბრაზილიის პრეზიდენტის ჟაირ ბოლსონარუს მხარდამჭერები დიდ ქალაქებში შეიკრიბნენ, რათა მხარი დაუჭირონ ულტრამემარჯვენე ლიდერს უზენაეს სასამართლოსთან დავაში.

უცხოური მედიის ცნობით, მას შემდეგ, რაც პრეზიდენტმა კონგრესი და უზენაესი სასამართლო მისი რეფორმების დაბლოკვაში დაადანაშაულა, შენობის დასაცავად დამატებითი ძალები მობილიზდნენ, ვინაიდან ბოლსონარუს მომხრეებს შესაძლოა შენობაში შეჭრა ეცადათ.

დღის პირველ ნახევარში ზოგიერთმა მათგანმა გაარღვია პოლიციის კორდონი, თუმცა მათ შენობაში შეჭრა ვერ შეძლეს.

BBC-ის ცნობით, პრეზიდენტის მოწინააღმდეგეები, ასევე, შეიკრიბნენ კონტრაქციაზე და იყო ვარაუდი, რომ მომხდარიყო შეტაკება, ზოგიერთი ოპონენტი კი ხალხს მოუწოდებდა, რომ საპროტესტო აქციაზე გამოვიდნენ 12 სექტემბერს, რათა პრეზიდენტის მომხრეებთან დაპირისპირება თავიდან აიცილონ.

ბრაზილიის პრეზიდენტმა რამდენიმე დღის წინ განაცხადა, რომ აქციები იქნება ულტიმატუმი იმ მოსამართლეებისთვის, ვინც მისი მთავრობის წინააღმდეგ არაკონსტიტუციურ გადაწყვეტილებებს იღებს.

ბოლსონარუს რეიტინგი 2022 წლის არჩევნებამდე ისტორიულ მინიმუმზე დაეცა. Atlas Institute-ს გამოკითხვამ აჩვენა, რომ მოსახლეობის 61%-მა მისი მთავრობის საქმიანობა ცუდად შეაფასა,

ბრაზილიის პრეზიდენტმა, ასევე, სცადა უზენაესი სასამართლოს დადანაშაულება იმაში, რომ მთავრობას დაგვიანებული რეაგირება ჰქონდა პანდემიაზე, ის ამტკიცებდა, რომ მათ შეუშალეს ხელი სწრაფი ზომების მიღებაში ვირუსის შესაჩერებლად.