ჯანდაცვის მინისტრის მოადგილის, თამარ გაბუნიას ინფორმაციით, ციციშვილის კლინიკაში კორონავირუსით გარდაცვლილ 15 წლის მოზარდს მძიმე ფონური დაავადებები ჰქონდა. მისი თქმით, კორონავირუსი განსაკუთრებული რისკია მათთვის, ვისაც ჯანმრთელობის პრობლემები აქვს. გაბუნია აღნიშნავს იმასაც, რომ ზოგადად, ბავშვებში ინფექცია მსუბუქი და საშუალო ფორმებით მიმდინარეობს.

"ძალიან სამწუხარო შემთხვევაა 15 წლის მოზარდის გარდაცვალება, რომელსაც მძიმე ფონური დაავადებები აღენიშნებოდა და გარკვეულწილად, ამან განაპირობა მდგომარეობის დამძიმება.

სხვა შემთხვევაში, საბედნიეროდ, ბავშვთა ასაკში, შემთხვევების უდიდესი ნაწილი არის მსუბუქი და საშუალო მიმდინარეობის. მაგრამ, იმ ბავშვებს, ვისაც აქვს გარკვეული ჯანმრთელობის პრობლემები, რა თქმა უნდა, მათთვის კორონავირუსი არის განსაკუთრებული რისკი, ისევე, როგორც ეს არის ნებისმიერ ზრდასრული ადამიანისთვის", — განაცხადა თამარ გაბუნიამ.

ჯანდაცვის მინისტრის მოადგილის ინფორმაციით, გაზრდილია რეანიმაციაში მყოფთა რაოდენობაც. გაბუნიას თქმით, ამ დროისთვის რეანიმაციულ განყოფილებაში 400-ზე მეტი პაციენტი მკურნალობს, რაც ბოლო კვირებს შორის ყველაზე მაღალი მაჩვენებელია.

5 სექტემბერს, გვიან ღამით კორონავირუსით 15 წლის მოზარდი გარდაიცვალა. როგორც კლინიკის დირექტორმა, დავით რეხვიაშვილმა On-ge-ს უთხრა, მოზარდი მათთან 1-ლი სექტემბრიდან მკურნალობდა.

მინისტრის მოადგილემ აქამდეც არაერთხელ განმარტა, რომ მიუხედავად ბავშვების ინფიცირების რაოდენობის ზრდისა, ამ ასაკობრივ ჯგუფში კორონავირუსი შედარებით მსუბუქად მიმდინარეობს. რამდენიმე კვირის წინ თამარ გაბუნიამ განაცხადა, რომ დელტა შტამს მეტი დამაზიანებელი ეფექტი მაღალი ასაკის მოსახლეობაში აქვს.