საქართველოს პრეზიდენტი სალომე ზურაბიშვილი ავღანეთში ქალთა უფლებების დაცვისა და გაძლიერების შესახებ ქალ ლიდერთა ერთობლივ მოწოდებას შეუერთდა. ინფორმაციას ამის შესახებ საქართველოს პრეზიდენტის ადმინისტრაცია ავრცელებს.

"ჩვენ, ლიდერ ქალებს, გვინდა დავარწმუნოთ ავღანელი ქალები და გოგოები, რომ ყურადღებით დავაკვირდებით მათ ქვეყანაში განვითარებულ მოვლენებს და გავაგრძელებთ მათი უფლებებისა და შესაძლებლობების მხარდაჭერას", — ნათქვამია ქალი ლიდერების მოწოდებაში.

პრეზიდენტის ადმინისტრაციის განცხადებით, ისინი საერთაშორისო თანამეგობრობას მოუწოდებენ, დიდი ყურადღება გაამახვილონ ავღანეთში ქალების უფლებებზე. ეს მოწოდება სლოვაკეთის პრეზიდენტის, ზუზანა ჩაპუტოვასა და ისლანდიის პრემიერ-მინისტრის, კატრინ იაკობსდოტირის ინიციატივაა. მოწოდებას შეუერთდნენ დანიის, ესტონეთის, ფინეთის, ლიეტუვის, ახალი ზელანდიისა და ნორვეგიის პრემიერმინისტრი და საბერძნეთისა და მოლდოვას პრეზიდენტები.

დღეს ავღანეთში ქალებმა განათლებისა და მუშაობის უფლებების მოთხოვნით აქცია გამართეს. მათ ქუჩაში გამოსვლა გაბრაზების გამო გადაწყვიტეს, რადგან მათი თქმით, თალიბანს ქალთა მუშაობის უფლებებზე პასუხები არა აქვს. როგორც აქციის მონაწილე ქალები ჰყვებიან, მათ სამსახურებში მისვლის უფლებას აღარ აძლევენ ან ოფისებში მისვლის შემთხვევაში, უკან აბრუნებენ.

ავღანეთზე კონტროლის ხელში აღების შემდეგ თალიბანის პრესსპიკერმა მედიასთან პირველ პრესკონფერენციაზე ქალთა უფლებებზე ისაუბრა. მან ამ საკითხს "ძალიან მნიშვნელოვანი" უწოდა და თქვა, რომ მხარს უჭერენ ქალთა უფლებებს, თუმცა მხოლოდ შარიათის კანონის ფარგლებში. მას შემდეგ კი, რაც თალიბებმა ავღანეთი დაიკავეს, არაერთმა ავღანელმა ქალმა საჯაროდ ისაუბრა საკუთარი შიშებისა და მოლოდინების შესახებ.

გაიგეთ მეტი: