პრემიერმინისტრმა, ირაკლი ღარიბაშვილმა 5 ივლისს დაგეგმილ ღირსების მარშს პროვოკაცია უწოდა და განაცხადა, რომ მათ ეს პროვოკაცია თავიდან აირიდეს. აღნიშნულზე პრემიერმინისტრმა ნაციონალურ მოძრაობაზე საუბრისას განაცხადა.

"ამიტომ დგანან ისინი[ნაციონალური მოძრაობა] ლგბტ მარშის კამპანიის უკან. მათი ორგანიზებით ხდებოდა ის მძიმე პროვოკაცია, რომელიც თავიდან ავიცილეთ ჩვენ. რა თქმა უნდა, ძალიან სამწუხარო იყო ის, რაც მოხდა. ჩვენ დავგმეთ ყველამ, არ შეიძლებოდა ჟურნალისტებზე თავდასხმა და კატასტროფული შეცდომა იყო, რაც მთავარია, თუმცა ყველა მოძალადე იქნა დასჯილი და დაპატიმრებული", — თქვა ღარიბაშვილმა ტყიბულის მერობის კანდიდატის წარდგენისას.

5-6 ივლისს ჰომოფობიურ და ძალადობრივი ჯგუფების თავდასხმის შედეგად 50-ზე მეტი ადამიანი დაშავდა, მათგან უმრავლესობა მედიის წარმომადგენელია. ძალადობრივი ჯგუფები თავს დაესხნენ თბილისი პრაიდის, სირცხვილიასა და ადამიანის უფლებათა ცენტრის ოფისებსაც. 11 ივლისს, აქციაზე ნაცემი TV პირველის ოპერატორი, ლექსო ლაშქარავა გარდაიცვალა.

5-6 ივლისის ძალადობას წინ უძღოდა ქართული ოცნების ლიდერების განცხადებები იმაზე, რომ ღირსების მარშს მიზანშეწონილად არ მიიჩნევენ. 5 ივლისს, როცა უკვე დაწყებული იყო ძალადობა, ღარიბაშვილმა ისევ თბილისი პრაიდი გააკრიტიკა, რამდენიმე დღეში კი გაიმეორა ჰომოფობიური ჯგუფების გზავნილი პროპაგანდის შესახებ.

ჰომოფობიური და ძალადობრივი კონტრაქციის ორგანიზატორები ამ დრომდე არ დაუკავებიათ.