ავღანეთის ახალ მთავრობას თალიბანის თანადამფუძნებელი და ერთ-ერთი ლიდერი, მოლა აბდულ ღანი ბარადარი უხელმძღვანელებს. ამის შესახებ ინფორმაციას Reuters სამ სხვადასხვა შიდა წყაროზე დაყრდნობით ავრცელებს.

ამასთან, მათი ინფორმაციით, თალიბანის დამფუძნებლის, მოლა ომარის შვილი და შერ მუჰამედ აბას სტანეკზაც მთავრობაში მაღალ თანამდებობებს გაინაწილებენ.

ბარადარი მოლაპარაკებების მიზნით 21 აგვისტოს ქაბულში ჩავიდა. მანამდე, რამდენიმე დღით ადრე, ის ავღანეთში, დიდხნიანი პაუზის შემდეგ დაბრუნდა. ის წლების განმავლობაში ავღანეთში არ ცხოვრობდა.

2021 წლის 14 აპრილს აშშ-ის პრეზიდენტმა ავღანეთიდან ამერიკული ჯარების გაყვანის შესახებ განაცხადა, რომ გაყვანა 1-ელ მაისს დაიწყებოდა და 31 აგვისტომდე დასრულდებოდა. ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო — პრეზიდენტი გაიქცა, თალიბებმა ძალაუფლება მოიპოვეს.

მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ძალაუფლების მიღების შემდეგ თალიბებმა არაერთი ადამიანი მოკლეს და დაჭრეს, მათ შორის, ისინი, ვინც ქვეყნიდან გაქცევას ცდილობდნენ.

ავღანეთის ხელისუფლების ნაწილი, რომელსაც სათავეში ვიცე-პრეზიდენტი ამრულაჰ სალეჰი უდგას, დანებებას არ აპირებს. ის სამხედრო მეთაურ აჰმად მასუდთან ერთად მომხრეებს პანჯშირის ხეობაში კრებს.

31 აგვისტოს ოფიციალურად დასრულდა ევაკუაციის პროცესი და 20-წლიანი ომის შემდეგ ავღანეთი უკანასკნელმა ამერიკელმა სამხედრომაც დატოა. ქაბულის აეროპორტს ახლა თალიბები აკონტროლებენ.

გაიგეთ მეტი: